21/03/2013 10:25:23

Vota e emigrantëve para adoleshtëve

nga Alfred Mirashi

FIRENZE - Meqë jetojmë në momente demokracie dhe kemi fatin të shprehemi lirshëm, do më pëlqente që dhe bashkëatdhetarët e mi kudo në botë të fitojnë dinjitetin e jetës së përditshme dhe të shprehen po kaq hapur sa unë. Jetoj si artist në një prej qyteteve botërore të kulturës dhe artit, Firenze. Ndjehem mirë kur shikoj atë që kam bërë dhe ku më ka çuar. Kam 22 vjet në Itali dhe nuk dua të trishtohem më, sa herë që kthej kokën në Shqipëri ku për pak muaj votohet për zgjedhjen e Parlamentit. Sinqerisht habitem nga politika shqipëtare.

Pse ?

Si ka mundësi që politikanët nuk shqetësohen për një milion e gjysëm shqipëtare që jetojnë jashtë ? Si ka mundësi që nuk u sigurohet e drejta minimale e votës për të zgjedhur parlamentarët e vet ?

Më vjen të qesh kur lexoj në internet se kryeministri Berisha e anëtarët e LSI-së thonë se janë dakord të votojnë 16 vjeçarët. Ide brilante...! Po ne ?

Kemi 22 vjet që mbajmë familjet: jemi kthyer në shtyllën e ekonomisë shqipëtare; këtu ka shumë studentë të diplomuar nëpër universitet e botës e nuk ju ofrohet asnjë projekt-pune për t'u kthyer në atdhe. Anjërit prej nesh nuk u jepet shans të votojnë për fatin e atdheut, 16 vjeçareve po. Pse ? Mos janë lehtësisht më të manovrueshem se ne ?

Për politikën shqiptare ne emigrantët jemi pa atdhe, sepse na duan kur u mbushim xhepat policisë së korruptuar që ka 22 vjet e del ende rrugës, veshur me "rroba të ndershme" dhe me paturpesinë më të madhe bën rolin e "lypësit modern".

Provojnë me të gjitha mënyrat të t'a marrin lekun. E kujt nuk i ka ndodhur...!
Mua personalisht më ka ndodhur...këtë e dinë të gjithë shqipëtarët dhe më e keqja, e dinë dhe politikanët.... turp...!

E kujt nuk i ka ndodhur t'i japë lekë doktorave, kur i është sëmurë vëllai, ose ndonjë pjesëtar i familjes apo shok...! Nuk e dinë thua politikanët këtë ? E dinë djema e dinë, por s'ju intereson sepse nëse atyre ju sëmuret ndonjë anëtar i familjes e dërgojnë në Europë. Lekët s'ju mungojnë.

Unë e di se për këto gjëra kanë shkruajtur shumë herë, e kanë vërtetuar me prova, por realiteti nuk ndryshon. Si ka mundësi që ka më shumë se dy dekada dhe në politikë kemi të njëjët njerëz, si nga e majta apo e djathta ?

Ne duhet të dëgjohemi.

Duhet që parlamentarët shqipëtarë të zgjidhen vetëm dy mandate. Kështu të paktën i largojmë në mënyrë demokrate me votat e popullit ata që s'dinë gjë tjetër vetëm të hidhen nga një karrige në tjetrën. Të kërkohet të votojnë të gjithë qytetarët shqiptarë kudo në botë.

Kandidatët për deputete të zgjidhen në mënyrë të ndershme, jo duke paguar lekë. Shpresoj që këto dy gjëra t'i ndryshojmë sa më shpejt, sepse populli shqiptar është i shkatërruar me këtë DEMOKRACI të korruptuar.


* Autori është artist dhe fitues i çmimit të parë në Olimpiadën e Londrës për pikturë

HermesNews - ©2013

Dërgo me email | Stampo artikullin