20/03/2013 16:55:23

Miratohet projektligji i titujve

Drafti përcakton llojet e dekoratave, titujve dhe medaljeve, si dhe autoritetet shtetërore kompetente; rregullat, procedurat dhe kriteret për propozimin, shqyrtimin, dhënien apo mbajtjen e tyre

TIRANË - Komisioni parlamentar i ligjeve miraton pr/ligjin për dekoratat, titujt e nderit, medaljet dhe titujt vendorë të nderit, i propozuar nga Ministria e Drejtësisë.

Përfaqësuesi i ministrisë duke mbrojtur draftin tha se ai përcakton të gjitha llojet e dekoratave, titujve dhe medaljeve, si dhe autoritetet shtetërore kompetente; rregullat, procedurat dhe kriteret për propozimin, shqyrtimin, dhënien apo mbajtjen e tyre.

Pr/ligji përcakton fillimisht të gjitha institucionet që kanë të drejtë të bëjnë propozime për dhënien e dekoratave apo titujve të nderit, duke i kufizuar ato vetëm në 9 drejtues institucionesh, si kryetari i Kuvendit, kryeministri, ministrat apo dhe kryetarët e gjykatave dhe të Akademisë së Shkencave.

Drafti po ashtu parashikon një ndarje të qartë të dekoratave, titujve dhe medaljeve për meritat për të cilat ato jepen. Risi kryesore e tij është ndarja që i bëhet dekoratave dhe titujve të nderit, që do të vijojnë të jepen vetëm nga Kreu i Shtetit, ndërkohë që do të ekzistojnë dhe medaljet, por që më pas do të jepen nga kryetari i Kuvendit, kryeministri dhe ministrat.

Ndërkohë që medaljet që do të jepen nga krerët e institucioneve, të renditura të dyta apo të tretat në hierarkinë e shtetit shqiptar, siç është kryetari i Kuvendit dhe kryeministri, do të jepen si shpërblim për veprimtarinë e shquar në një fushë të veçantë profesionale.

HermesNews - ©2013

Dërgo me email | Stampo artikullin