20/03/2013 15:57:39

Nga Facebook-u në shesh, qytetarët në protestë

Pjesëmarrësit protestuan kundër asaj që ata e quajtën sistem të drejtësisë, i cili nuk garanton të drejtat themelore të shtetasve

TIRANE - Pas dëshmisë tragjike të pedofilit i cili deklaroi se ka vrarë pas abuzimit me të, një fëmijë 11 vjeçar, dhe tentativës për të kryer të njëjtin akt dhe me një fëmijë tjetër, dhjetëra qytetarë dhe aktivistë të shoqërisë civile protestuan të mërkurën para selisë së Presidencës. Pjesëmarrësit protestuan kundër asaj që ata e quajtën sistem të drejtësisë, i cili nuk garanton të drejtat themelore të shtetasve.

E nisur fillimisht si reagime spontane në rrejtin social aq shumë të përdorur Facebook, protesta e qytetarëve prej disa ditësh ka qenë në fokusin e komunikimeve ku pjesa më e madhe i janë bashkuar kësaj nisme qytetare për të mbrojtur fëmijët e familjen nga fenomene që vënë në rrezik jetën dhe ekzistencën e tyre.

Protesta e qytetarëve tentoi të zgjojë ndërgjegjen qytetare për t'ju bashkuar dhimbjes së prindërve e fëmijëve me të cilët është abuzuar. Sipas drejtuesve të saj, shoqëria shqiptare nuk duhet të qëndrojë më indiferente për çështje kaq të rëndësishme por duhet të ngrejë zërin e saj në mbështetje të viktimave të dhunës, qofshin këta gra apo fëmijë, e të kërkojë që sistemi i drejtësisë të funksionojë dhe që ligjet të zbatohen.

HermesNews - ©2013

Dërgo me email | Stampo artikullin