20/03/2013 10:20:23

Obama vizitë zyrtare në Lindjen e Mesme

Presidenti amerikan, takime me krerët arabë. Në fund vizitë në Jordani

(16:24) Presidenti amerikan, Barack Obama mbërriti pak më parë në aeroportin ''Ben Gurion'', në Tel Aviv, për vizitën e tij të parë në Izrael. Barack Obama u prit në aeroport nga presidenti i Izraelit Shimon Peres, nga kryeministri izraelit, Benyamin Netanyahu dhe nga përfaqësues të tjerë të lartë të qeverisë vendase. Ndërsa Obama mbërriti në Tel Aviv, në Rripin e Gazës mijëra palestinezë kanë nisur një marshim proteste në bulevardin qendror, Omar al-Mukhtar.Të kryesuar nga delegacione të Hamasit, të Xhihadit islamik, të Fatahut dhe të fraksioneve të tjerë të së majtës, protestuesit brohorisnin slogane antiamerikane duke shprehur irritim kundër SHBA-së për ''mbështetjen e njëanëshme'' për Izraelin. Për zgjidhjen e konfliktit, shtonin protesuesit, SHBA-ja duhet të mos mbajë anën e njërës palë.


JERUSALEM - Barack Obama mbërrin sot në Izrael për një vizitë zyrtare, që do ta çojë gjithashtu në Territoret Palestineze dhe në Jordani. Me uljen e "Air Force One" në aeroportin e Tel Avivit, presidenti amerikan do të vëzhgojë një bateri të sistemit antiraketor "Iron Dome", i financuar nga SHBA-ja. Më pas ai do të udhëtojë drejt Jeruzalemit, ku do të zhvillojë një takim me presidentin, Shimon Peres dhe më pas me kryeministrin, Benjamin Netanyahu. Nesër do të zhvillojë bisedime në Ramallah, me presidentin palestinez, Mahmoud Abbas.
Barack Obama do të udhëtojë më pas në Jordani, ku do të takojë mbretin Abdallah II.

HermesNews - ©2013

Dërgo me email | Stampo artikullin