18/03/2013 12:01:21

Ligji i ri ne vend per armet

Shkurtohet lista e personave qe do te mbajne arme

TIRANE- Kuvendi ditën e hënë nisi seancën e radhës plenare, duke diskutuar rreth pr/ligjit "Për armët", i kundërshtuar nga opozita gjatë diskutimit në komisionet parlamentare. Flamur Noka, Ministër i Brendshëm, si kreu i institucionit propozues të këtij pr/ligji, në fjalën e tij gjatë seancës plenare theksoi se ky draft synon të shkurtoj listën e personave ligjërisht të lejuar për përdorimin e armëve.

Sipas tij, ky ligj në thelb të tij kërkon të përmirësoj ligjin e vendosur prej qeverisë socialiste vite më parë, ndërsa kërkon uljen e numrit të personaliteteve që lejohen të mbajnë armë me leje. Pr/ligji, tha Noka, respekton rrethanat që karakterizojnë vendin dhe zhvillimin e tij".
Gjate diskutimit të këtij pr/ligji nëpër komisione parlamentare, neni që parashikon pajisjen me armë të politikanëve ka qenë ngërçi i draftit. Opozita e kundërshtonte këtë nen, pasi sipas saj është e panevojshme mbajtja e armëve nga deputetët apo ministrat.

P/ligji "Për armët" synon përafrimin me direktivën e BE-së,"Për kontrollin e blerjeve dhe posedimit të armëve".Ai përfshinnjë fushë të gjerë veprimi, ndërkohë që dispozitat e tij nuk zbatohen për armët e Forcave të Armatosura Shqiptare. Ligji detajon tipet e 'armëve të zjarrit', që nga 'arma e shkurtër', 'armë e gjatë', 'armë automatike', gjysmautomatike e deri tek specifikimi i armëve të zjarrit 'për gjueti', armëve sportive, dekorative etj.

Një risi e p/ligjit lidhet me personat që kanë të drejtë të pajisen me autorizim për mbajtje arme zjarri nga organi kompetent i Policisë së Shtetit, ku përfshihen deputetët, anëtarët e Këshillit të Ministrave, të Gjykatës Kushtetuese, të Gjykatës së Lartë, Prokurori i Përgjithshëm, zv/ministra, prefektë, kryetarë të qeverisjes vendore, gjyqtarë.

Axhenda e sotme e parlamentit parashikon dhe ratifikimin e tre marrëveshjeve, si dhe një interpelancë me ministrin e Bujqësisë, Genc Ruli lidhur me shqetësimin e krijuar së fundi për nivelin e lartë të aflatoksinës në disa lloje qumështi, që tregtohen në Shqipëri

HermesNews-©2012

Dërgo me email | Stampo artikullin