15/03/2013 12:14:26

Fierza, rritet niveli i prurjeve në hidrocentral

Pavarësisht reshjeve të rrëmbyera të shiut, të cilat ende vazhdojnë të bien, në akset rrugore të qarkut të Kukësit, nuk paraqitet situatë problematike

KUKËS - Reshjet e mëdha të shiut, që përfshinë këto ditë pjesën më të madhe të vendit, kanë sjellë rritjen e shpejtë të nivelit të ujrave të liqenit të Fierzës. Burime nga salla e komandës së hidrocentralit të Fierzës bënë të ditur se "niveli i ujrave të liqenit ka arritur në mbi 289 metra mbi nivelin e detit, ndërsa prurjet e ujit në orët e mëngjesit arrijnë në mbi 1100 metër kub ujë në sekondë".

Ndërkohë që pavarësisht reshjeve të rrëmbyera të shiut, të cilat ende vazhdojnë të bien, në akset rrugore të qarkut të Kukësit, nuk paraqitet situatë problematike

Përjashtim bëjnë disa akse rrugore, si ajo e autostradës Morinë- Kukës-Tunel, Kukës – Shishtavec, Kukës – Peshkopi, Fierzë – Qafë Mali, Bajram Curri – Valbonë, Bajram Curri – Lekbibaj, ku ka patur rrëshqitje të dherave e gurëve në trasenë e rrugës. Ka qenë ndërhyrja e shpejtë e punonjësve të Mirëmbajtjes së Rrugëve që ka mundësuar mbajtjen hapur të këtyre segmenteve.

Sipas drejtorit të Autoritetit Rrugor, në rajonin e Kukësit, Arben Basha, reshjet më të mëdha të shiut kanë qenë në rrethin e Tropojës, ku probleme më të madha paraqiten në akset rrugore Bajram Curri-Valbonë, Bajram Curri – Lekbibaj dhe Fierzë- Qafë Mali, ku falë ndërhyrjes së menjëherëshme të strukturave përgjegjëse, situata është thuajse e normalizuar plotësisht në të gjitha akset rrugore të rajonit verilindor.

HermesNews - ©2013

Dërgo me email | Stampo artikullin