15/03/2013 11:52:47

Dollari në nivelin më të lartë kundrejt € në 3 muaj: zhvlerësohet Leku

Monedha e përbashkët e 17 vendeve europiane u dobësua, teksa kostoja e huamarrjes italiane u rrit në ankandin e obligacioneve

TIRANE - Në fund të kësaj jave monedha e gjelbërt amerikane dollari, arriti në nivelin më të lartë të tre muajve kundrejt euros, sipas të dhënave nga bursat ndërkombëtare, duke reflektuar forcim të vlerës së saj edhe në tregun e këmbimit valutor vendas, kundrejt lekut.

Sipas analistëve bankarë, monedha e përbashkët e 17 vendeve europiane u dobësua, teksa kostoja e huamarrjes italiane u rrit në ankandin e obligacioneve. Dollari u vlerësua 0.6% dhe u kuotua në 1.2961 kundrejt euros, duke arritur në nivelin më të lartë që nga 10 dhjetori i vitit të kaluar.

Kursit zyrtar i Bankës Qendrore tregon se në tregun valutor vendas të premten, leku është zhvlerësur ndaj dy valutave kryesore euro dhe dollar. Euro është kuotuar sot në 140.26 lekë, 0.05 lekë më shumë se një ditë më parë. Pas një ditë të vështirë në bursat ndërkombëtare, monedha europiane duket se po e merr veten ngadalë në treg.

Ekspertët thonë se, megjithë efektet negative që mund të vijnë nga tregjet e huaja, kërkesa e lartë si dhe ndërhyrjet e Bankës së Shqipërisë, do të ndikojnë që të ruhet gjithnjë një raport i lartë i euros kundrejt lekut. Nga ana tjetër, dollari po vijon forcimin e tij.

Gjatë ditës së sotme 1 dollar është këmbyer me 107.76 lekë, 0.17 lekë më shumë se një ditë më parë. Në ditët në vazhdim mund të shohim forcim të mëtejshëm të monedhës amerikane, falë situatës pozitive në tregjet ndërkombëtare.

HermesNews - ©2013

Dërgo me email | Stampo artikullin