13/03/2013 18:43:04

Ai quhet Renaldo dhe është shembull për ne

nga Doriana Metollari

TIRANE - Ai quhet Renaldo Bregu (renaldobregu@gmail.com) dhe ka zgjedhur të luftojë për të drejtat e tij. Historia e studentit nuk është e re dhe as e jashtëzakonshme, duke parë morinë e ngjarjeve që ndodhin ndodhin në Shqipëri, por ngjarja e një të riu, që u godit në rrugë. Në fakt po të thoja u godit nuk do të isha krejt e vërtetë, pasi Renaldo u rrah më shkop gome nga efektivi i një policie private. Ky i fundit rrezikoi t'i vinte poshtë makinës së vet kalimtarët që po kalonin përgjatë vijave të bardha.

"Çfarë bën o njeri se na shkele ?!"

Kaq foli Renaldo që të prekej sedra e policit, i cili bëri ç'bëri, parkoi makinën, siç tha Renaldo, dhe filloi ta godasë me shkop gome. Kalimtarët e tjerë u larguan me vrap. Renaldo u rrah. Prezent, qytetarë në rrugë.

Jo prit se do kishte vazhduar më tej, por njeriu që shoqëronte policin, pra shoku e ndaloi.

"Më goditi me shkop gome si i çmenduar", më tha Renaldo.

Mjekët i japin regjim shtrati nëntë ditë dhe vërtetohet konsumimi i veprës penale "rrahje", por Prokuroria vendos të mos fillojë proçedim penal.

Renaldo insiston dhe sot kishte seancën e parë. Normalisht që Prokurori do të mungonte, ndërsa më parë, në gjykatë i sugjeruan ta konsiderojë veten me fat se mund të shkonte më keq dhe se në Shqipëri ndodhin gjëra më të rënda. Ai nuk ishte plagosur rëndë dhe për më tepër ishte gjallë. Çfarë donte më shumë se kaq ?!

Vërtet, çfarë mund të kërkojë më tëpër se kaq një qytetar ?

Ndjesë për ironinë time i dashur lexues, por këtij lloj absurditeti duhet t'i rallohen rastet në Shqipëri, jo t'i shtohen deri në Gjykatë.

Këtë lloj sjelljeje të Prokurorisë apo Gjykatës e justifikon vetëm një rend agresiv siç është ai shqiptar dhe jemi në limitet e humorit, kur mendoj se të kërkosh të mos dhunohesh dhe të japësh shembullin e një qytetari të civilizuar, t'i drejtohesh ligjit dhe shtetit dhe jo të bësh vetëgjyqësi, konsiderohet dobësi.

Por ti Renaldo, më dhe dhe një përgjigje shumë të bukur kur the, "Unë bëj timen dhe po vazhdoj t'i bëj gjërat siç duhet...ato që me ndodhin mua, i bëj publike në mënyrë që të preken qytetarët, pavarësisht që shumica këtu mendon që në këtë vend nuk gjen dot Drejtësi...". Nëse rastet e krimeve janë rritur në Shqipëri, sidomos vrasjet, kjo për shkak se shumë njerëz nuk e mendojnë më si ti.

Dhuna nuk justifikohet në asnjë rast. Po të jenë më shumë se një që do sillej si Renaldo, deklaratat e krerëve të gjyqsorit do të kishin më efekt tek njerëzit. Qytetarët nuk do të jetonin me idenë se polici në rrugë është ose për t’a dhënë ose për t’a marrë dajakun, ujk ose dele, por një njeri që u shpjegon njerëzve atë që duhet dhe nuk duhet të bëjnë.

Unë e di se Shqipëria do shumë për ta bërë, por siç thotë Renaldo, nëse këto gjëra bëhen publike, mund të mos ketë një rast të dytë.

Ndërsa Renaldo vazhdon me seancat gjyqsore, jam kurioze të di cili nëse Prokuroria e di që bëhet fjalë për vepër penale ? Ndjesë prapë për ironinë, por nëse dhe kjo nuk do t'ia vlejë, do ta bëj prapë.

HermesNews - ©2013

Dërgo me email | Stampo artikullin