13/03/2013 17:26:50

Policia liron hapësirat publike nga ambulantët

Gjatë aksionit të ditës së sotme janë vendosur të paktën 10 gjoba me vlerën 5 mijë lekë, ndërsa 50 shitës ambulantë janë larguar nga trotuari

GJIROKASTËR - Policia bashkiake e Gjirokastrës ndërmori sot një aksion për lirimin e hapësirave publike, që mbahen të bllokuara nga shitësit ambulantë në mënyrë të paligjshme. Abedin Kopeci, shef i policisë bashkiake, tha se, "aksioni ka nisur pas denoncimeve të banorëve, të cilët çdo ditë janë të detyruar të lëvizin në mes të rrugës, pavarësisht se ekziston trotuari". "Të gjitha vendet publike do të lirohen, pasi është e papranueshme që jeta e banorëve gjirokastritë të vihet në rrezik për shkak të zaptimit nga shitësit ambulantë", shprehet Kopeci. Sipas tij, kohët e fundit fermerët gjirokastritë, por edhe komuniteti rom tregtojnë në trotuar, gjë që ka krijuar një pasiguri për jetën e banorëve. "Gjatë aksionit të ditës së sotme janë vendosur të paktën 10 gjoba me vlerën 5 mijë lekë, ndërsa 50 shitës ambulantë janë larguar nga trotuari", thekson Kopeci, ndërsa nënvizoi se një treg fshatar i mirëfilltë pothuajse nuk ekziston në qytetin e Gjirokastrës.

HermesNews - ©2013

Dërgo me email | Stampo artikullin