12/03/2013 18:29:15

Griden dhe humbasin jetën në lumë bashkëshortët

Çifti rom mësohet se kishte kontradikta mes njëri tjetrit, ndërsa 30 vjeçarja prej kohësh vuante nga depresioni

ELBASAN - Rrjedha e ujit të Zaranikës, i ka marrë jetën në mesditë një çifti nga Elbasani, banorë të komunitetit rom. Burime zyrtare nga Policia e Elbasanit bëjnë të ditur se shkak i ngjarjes mendohet të ketë qenë një debat mes dy bashkëshortëve, në ambjentet e një lokali, pranë përroit të Zaranikës, kur 30 vjeçarja Miranda Ramazani, pasi ka debatuar me bashkëshortin e saj, Agim Jashari është drejtuar drejt përroit.

Bashkëshorti i Mirandës ka shkuar nga pas për ta shpëtuar, por fatkeqësisht, uji e ka marrë me vete. Ka qenë edhe vëllai i 30 vjeçares, i cili ka shkuar për t‘i ardhur në ndihmë motrës së tij, por fatkeqësisht nuk ka mundur dot ta shpëtojë.

Policia, e cila ka shkuar menjëherë në vendin e ngjarjes, i ka ardhur në ndihmë gruas së re, kur kjo e fundit, megjithëse i është nënshtruar një ndërhyrje kirurgjikale në spitalin rajonal të qytetit, nuk ka mundur të mbijetojë.

50 metra më larg, Policia gjeti edhe trupin e pajetë të bashkëshortit të 30 vjeçares, vdekja e të cilit, sipas uniformave blu, mendohet të ketë ardhur për shkak të mbytjes.

Grupi hetimor ka nisur hetimet për zbardhjen e plotë të ngjarjejes. Çifti rom mësohet se kishte kontradikta mes njëri tjetrit, ndërsa 30 vjeçarja prej kohësh vuante nga depresioni.

HermesNews - ©2013

Dërgo me email | Stampo artikullin