12/03/2013 18:17:24

26 kërkesa për adoptime gjatë 2012-tës

Vitin që shkoi rreth 30 foshnja u braktisën që në maternitet dhe 17 të tjerë nga prindër që nuk kishin mundësi ekonomike

TIRANË - Birësimi i jep mundësi fëmijëve jetim apo të braktisur të jetojnë në familje, por gjithashtu u jep mundësi dhe çifteve pa fëmijë të gëzojnë familjet e tyre.

Sipas të dhënave më të fundit, gjatë vitit 2012 janë regjistruar 26 kërkesa për birësim. Prej tyre 21 kërkesa janë të përfunduara ndërkohë që 5 janë ende të proces.

Ndërkohë rezulton se vitin që shkoi rreth 30 foshnja u braktisën që në maternitet dhe 17 të tjerë nga prindër që nuk kishin mundësi ekonomike. Një pjesë e prindërve janë mbështetur nga shteti dhe organizata të ndryshme.

Sipas Rudina Hoxhës, drejtoreshë e Shtëpisë së Fëmijve, nga 0 në 5 vjeç, “Më shumë jetimë po birësohen nga familje shqiptare që kanë edhe fëmijë të tjerë. Kjo tendencë është në rritje. Ndërsa për fëmijët romë më shumë interes kanë pasur të huajt, pasi ata kanë më pak paragjykime raciale”, tha ajo.

Procesi i birësimit të një fëmije është proces relativisht i gjatë në kohë. Institucioni përgjegjës në vendin tonë është Komiteti Shqiptar i Birësimeve të cilët krijojnë një listë me fëmijët dhe familjet e përshtatshme për birësim.
Sipas të dhënave nga Komiteti Shqiptar i Birësimeve, rreth 80 % e fëmijëve birësohen në Shqipëri pasi dhe vetë legjislacioni i jep përparësi birësimit të fëmijëve brenda vendit.

Ndërkohë pjesa tjetër e tyre, kryesisht fëmijët me probleme shëndetësore, për t`u dhënë një mundësi më tepër për kurimin e tyre, birësohen nga familje jashtë vendit.

Birësimi i fëmijëve shqiptar jashtë Shqipërisë bëhet duke u bazuar në marrëveshje mes shtetesh. Vendet me të cilat Shqipëria ka marrëveshje për birësim janë Italia, SHBA, Kanadaja, Spanja dhe Franca.

HermesNews - ©2013

Dërgo me email | Stampo artikullin