12/03/2013 12:41:26

Athinë, Renato Mekolli fiton Çmimin e parë në Artin e Gastronomisë

I riu shqiptar, tre herë çmim Nderi në Gastronomi. Kapelen e Artë ia dedikoj gjithë shqiptarëve

ATHINE - Çmimin e parë Kapelja e Artë 2013 për kuzhinën moderne greke dhe për këtë vit e mori Renato Mekolli.

I riu nga Shqipëria, konkuroi mes më të mirëve të guzhinës në Greqi dhe është shqiptari i parë në histori që e merr këtë çmim për tre herë me radhë, në një konkurs me 225 kandidatë në artin e gastronomisë.

Renato Mekolli u rendit ndër 20 më të mirët në Greqi dhe menjëherë më pas në vend të parë.

Shumë sinqerisht ka falenderuar të gjithë miqtë dhe fansat në faqen e tij personale. "Eshtë shumë pak t'ju them Faleminderit ! E keni bërë ditën time kaq të bukur. Kanë kaluar pak orë nga fitorja ime dhe mesazhet, telefonatat nga ju miq, gazetarë greke apo shqiptare, kritikë të gastronomisë, këtu në Athinë, në Facebook, në punë, më kanë zhytur në një oqean gëzimi. Nuk kishte shans që mos kishte fitore, pasi çdo kritikë nga gazetarët grekë e lexuam bashkë, çdo pjatë të re të sezonit tim e shijuam bashkë, shumica në foto dhe në restorant. Në çdo moment të punes time ju ishit aty, duke me uruar sukses, gjithë kjo energji kaq pozitive më çoi drejt një fitoreje dhe në këtë fitore jeni dhe ju me mua të dashur miq, me lot në sy ju falenderoj shumë nga zemra."

Në një intervistë për HermesNews Renato Mekolli thotë se këtë çmim ia dedikonte të gjithë shqiptarëve kudo që janë.

Renato njihet mbi të gjitha për artin e tij plot finesë në gatim, dekorin e pjatave dhe risinë që ka sjellë në gastronominë moderne. Sekreti i suksesit, siç e ka thënë ai disa herë, është pozitiviteti dhe mbështetja që gjithmonë ka marrë dhe nga ata që ndjehen krenar për të, përfshi dhe Hermesnews, e cila ka kënaqësinë dhe nderin ta ketë mes bashkëpunëtorëve të vet në "Sekretet e Aromave të Renatos".

Suksese Renato, suksese nga të gjithë, mbi të gjitha për pasionin dhe vullnetin me të cilin jeton çdo ditë.

Doriana Metollari

Dërgo me email | Stampo artikullin