12/03/2013 04:33:52

'Key Resolve', vijojnë manovrat mes Koresë dhe SHBA-së

Koreja e Jugut dhe SHBA, që numërojnë 28 500 ushtarë në jug të gadishullit, filluan manovrat e tyre të përbashkëta të quajtura Key Resolve

SEUL - Trupat koreano-jugore dhe aleatët e tyre amerikanë filluan sot manovrat e përbashkëta ushtarake, të dënuara ashpër nga Koreja e Veriut që kërcënoi Seulin dhe Washingtonin me goditje bërthamore, me ndërprerje të pakteve kundër agresionit me Korenë e Jugut dhe ndërprerje të linjës së urgjencës.

Koreja e Jugut dhe SHBA, që numërojnë 28 500 ushtarë në jug të gadishullit, filluan manovrat e tyre të përbashkëta të quajtura Key Resolve. Këto të fundit janë në pjesë virtuale, por kanë mobilizuar mijëra ushtarë.

Ashtu si çdo vit, Pheniani ka dënuar manovrat që i krahason me pushtimin e Koresë së Veriut nga Koreja e Jugut me ndihmën e Uashingtonit. Këto manovra zhvillohen pas një jave tensionesh të forta në gadishull. Pheniani kërcënoi javën e kaluar se do të ndërpriste marrëveshjen e armëpushimi që i dha fund luftës së Koreve në vitin 1953 duke përmendur spektrin e një lufte termobërthamore.

Kërcënimet dhe demostrimet e forcës janë të zakonshme nga secila palë që prej fundit të luftës në vitin 1953, por disa vëzhgues e gjykojnë situatën aq të tendosur sa edhe incidenti më i vogël mund të ketë pasoja të rënda.

Pheniani njoftoi disa ditë më parë se do t'i jepte fund pakteve kundër agresionit me Korenë e Jugut, duke mbyllur linjën telefonike me Seulin dhe të gjitha pikëkalimet mes dy shteteve.

Lajmërimi erdhi pas vendosjes së sanksioneve nga OKB kundër Penianit, në lidhje me programin e tyre të debatueshëm bërthamor. Rezoluta e OKB ishte një përgjigje ndaj testit bërthamor të Koresë së Veriut muajin e kaluar. Më herët, Peniani ishte zotuar se do të përdorte të drejtën e saj për lëshimin e raketave me qëllim parandalues bërthamor ndaj ''agresorëve'' të tij.

HermesNews - ©2013

Dërgo me email | Stampo artikullin