12/03/2013 04:08:19

Lihet i lirë Kryebashkiaku Elvis Roshi

Kryebashkiaku Roshi akuzohej për goditje per shkak te detyres, si edhe mosbindje të urdhërit të policisë

(18:37) Gjykata e Kavajës ka lënë të lirë pak minuta më parë kryetarin e Bashkisë së këtij qyteti, Elvis Roshi, duke e cilësuar të paligjshëm arrestimin e tij. Roshi u transportua drejt Kavajës rreth orës 15.00 nën masa të rrepta sigurie nga Tirana, ku ndodhej prej të dielës në mbrëmje në Drejtorinë e Policisë së Qarkut. Elvis Roshi u ndalua te dielën në mbrëmje pas ndeshjes Besa-Tirana, pas kallëzimit penal, qe trajneri i ekipit të futbollit të Tiranës, Nevil Dede, beri ndaj tij, duke e akuzuar se e kishte goditur dhe e kishte kërcënuar me jetë në pushimin e ndeshjes, në dhomat e zhveshjes.


TIRANË - Kryetari socialist, Edi Rama, reagoi sot pas ngjarjes së mbrëmshme, ku sipas raportit të policisë, kryebashkiaku i Kavajës, Elvis Roshi, ka goditur trajnerin e skuadrës së futbollit Tirana, Nevil Dede. Në një deklaratë të publikuar në një nga faqet e tij në rrjetet sociale, Rama thotë se "nëqoftëse Elvis Roshi, kryebashkiaku i Kavajës, është grindur me duar pas ndeshjes me Nevil Dedën, trajnerin e Tiranës, kjo është e pajustifikueshme. Një personi publik, aq më tepër një qytetari të parë, nuk i lejohet të sillet si një tifoz i dalë duarsh prej etheve të një ndeshjeje. Nëse kështu ka ndodhur, qytetari i parë i Kavajës duhet t’i kërkojë ndjesë publikisht skuadrës mike dhe vetë publikut", shkruan Rama. Por, Rama e ka cilësuar si të patolerueshme sjelljen brutale, siç e vlerëson ai, të policisë me kryebashkiakun e Kavajes. "Sjellja ndaj Roshit është reagim policor me epsh politik për të goditur publikisht një kundërshtar, i cili i është bërë halë në sy pushtetit qyshse përzuri me votën e popullit Sali Berishen nga bastioni i prapambetjes njezetvjeçare", shkruan Rama. Fakti që kryebashkiaku mbahet ende në polici, sipas Ramës, është vetëdiskreditues për qëllimin politik të këtij operacioni skandaloz.

HermesNews - ©2013

Dërgo me email | Stampo artikullin