08/03/2013 11:03:39

Korrupsioni, pushohen nga puna inspektorët sanitarë

Policia ndalon Gazmir Bundo, shef i higjienës së Vlorës, Afroviti Gjyli, inspektore sanitare dhe Pandeli Bilbili, ndihmës-inspektor sanitar

TIRANË - Shefi i Higjienës së Vlorës dhe dy inspektorë sanitarë janë ndaluar nga policia, për shkak të ankimimeve për abuzim me detyrën. Ndërkohë, Ministri i shëndetësisë, Vangjel Tavo, ka udhëruar pushimin e menjëhershëm të tyre nga puna, si dhe ka dhënë masën e paralajmërimit për pushim nga detyra të kryeinspektorit sanitar të qytetit të Vlorës.

Drejtori i Përgjithshëm i Politikave Shëndetësore, Pëllumb Pipero, tha sot në një konferencë për mediat, se “ditët e fundit kemi patur disa ankesa për akte korruptive të papajtueshme me figurën e shtetit dhe të inspektorit sanitar të disa inspektorëve sanitarë nga subjekte të ndryshme të qytetit të Vlorës, për të cilat është në dijeni dhe Policia e Shtetit, e cila dje në mbrëmje ka bërë ndalimin e tyre”.

Policia ka ndaluar Gazmir Bundo, shefi i Higjienës së Vlorës, Afroviti Gjyli, inspektore sanitare dhe Pandeli Bilbili, ndihmës-inspektor sanitar. “Menjëherë, ministri i Shëndetësisë, i gjendur përpara një akti të tillë flagrant të shkeljes së ligjit, detyrës dhe etikës profesionale, ka urdhëruar pushimin e menjëhershëm nga puna të punonjësve të sipërpërmendur dhe i jep masën e paralajmërimit për pushim nga detyra të kryeinspektorit sanitar të qytetit të Vlorës, Leonard Selami", tha Pipero.

HermesNews - ©2013

Dërgo me email | Stampo artikullin