07/03/2013 17:58:42

Gjykata italiane dënon ish kryeministrin italian

Silvio Berlusconi dënohet me një vit burg nga një gjykatë në Milano

MILANO - Ish-kryeministri italian, Silvio Berlusconi u dënua sot me një vit burg nga gjykata e shkallës së parë në proçesin për blerjen e bankës ''Unipol'' në të cilën ai ishte akuzuar për shkelje të fshehtësisë së hetimit, një gjykim të cilin ai do ta apelojë.

Bëhet fjalë për të parin nga tre gjykimet e pritshme këtë muaj për Berlusconin, dy të tjerët i përkasin procesit në apel për mashtrim fiskal (Mediaset) dhe ai në gjykatën e shkallës së parë për prostitucion me minorene dhe abuzime me pushtetin (Rubygate).

Në këtë çështje, ish-kryeministri italian është gjykuar për për publikim të paligjshëm në fund të vitit 2005 në një gazetë të grupit të tij (''Il Giornale'') një përgjim telefonik mes shefit të së majtës të asaj kohe, Piero Fassino dhe presidentit të sigurimeve ''Unipol'', Giovanni Consorte.

Në këtë bisedë, Fassino i kishte deklaruar Consortes se "tashmë ne kemi një bankë''. Sipas akuzës, vendimi për publikimin e këtij përgjimi ishte marrë gjatë një takimi mes Berlusconit dhe vëllait të tij Paolo, pronar i ''Il Giornale'' më 24 dhjetor 2005 në Arcore, pronë e kavalierit, pranë Milanos.

Prokuroria kishte kërkuar tre vjet dhe tre muaj burg kundër Paolo Berlusconit, i cili u dënua me dy vjet e tre muaj.

HermesNews - ©2013

Dërgo me email | Stampo artikullin