07/03/2013 17:34:09

Historia e një pusete

nga Ardi Fraholli

ELBASAN - Kam nisur me dhjetëra herë të shkruaj për këtë pusetë, e me dhjetëra herë kam fshirë atë që kam shkruar. Nuk është dhe aq e lehtë, që një grope si kjo, t'i dedikosh disa rreshta. Kjo pusetë mbart brenda saj, historinë e një qyteti.

E gjendur absoulutisht, në një nga rrugët më të populluara të Elbasanit, qoftë në njerez, por dhe në automjete. E veçanta e kësaj pusete është se, kapaku i saj grabitet thuajse çdo ditë.

E çdo ditë puntorët e mirëmbajtjes e vendosin një të re. E çuditshme ? Jo aspak ! Në një qytet ku çdo pjesë e tija po shitet pak e nga pak për skrap, sa ndryshim do bënte kapaku i një pusete, gjendur aty, në mes të rrugës, krenare.

Dhjetëra makina kanë përfunduar aty. E çfarë pastaj. Në një qytet ku metali më i shtrenjtë është hekuri, e jo argjendi apo floriri, në një pusetë, kapaku i së cilës vidhet çdo ditë, mund të lexosh historinë e një qyteti brenda saj.

Brenda saj gjenden, e shkuara, e tashmja, varfëria, mirëqënia ekonomike dhe sigurisht, historia e një shoqërie që pret natën për të vjedhur kapakët e pusetave. Në mëngjes vuloset një kapak dhe natën i hiqet...

HermesNews - ©2013

Dërgo me email | Stampo artikullin