05/03/2013 18:47:01

Elbasan, gati listat e zgjedhjeve

Në qarkun e Elbasanit janë 7 bashki dhe 43 komuna, ndërsa parashikohet që këtë vit të shkojnë të votojnë më shumë se 35.000 zgjedhës në rang qarku

ELBASAN - Pjesa më e madhe e komunave në qarkun e Elbasanit i kanë dorëzuar dokumentacionet në Komisionin Qëmdror të Zgjedhjeve, i cili është kërkuar rreth dy muaj më parë nga Prefekti i Qarkut, Shefqet Deliallisi.

Sekretari i Përgjithshëm i Prefekturës, Admirim Kongoli, thotë se "janë vetëm pesë komuna në qark, të cilat aktualisht nuk i kanë dorëzuar dokumentacionet pranë KQZ”. Kongoli shton se "komuna Shalës, Labinot Fushë, Zavalinë dhe dy të tjera nuk kanë pasur informacione të sakta ose i kanë neglizhuar ato, duke vonuar dërgimin e dokumentacioneve që përmban edhe listën e votuesve pranë Ministrisë së Brendshme".

Në cilësinë edhe të kreut të grupit për ndjekjen e problematikave në zgjedhje e 23 qershorit në rang qarku, Admirim Kongoli shtoi se "komunat janë njoftuar për këtë problematikë dhe i është lënë një afat disa ditor për të plotësuar dokumentacionin përkatës".

Sipas Kongolit, shumë vështirësi të hasura në zgjedhjet paraardhëse tashmë kanë kaluar, siç janë qendrat e votimit, që kanë qenë rreth 5 kilometra larg, tashmë nuk ekzistojnë më, pasi në çdo fshat dhe zonë të largët votuesve u është krijuar mundësia që të kenë qendrën e votimit shumë pranë banesave të tyre.

HermesNews - ©2013

Dërgo me email | Stampo artikullin