05/03/2013 18:34:10

Tiranë, plan masash për sigurinë publike

Operacioni i gjerë që po zhvillohet, i bazuar në Planin Operacional të Drejtorisë së Përgjithshme të Policisë së Shtetit mbi Kontrollin e Territorit, synon rritjen e parametrave të sigurisë si dhe identifikimin dhe kapjen e personave që mbajnë armë zjarri

TIRANE - Policia e Kryeqytetit ka vënë në zbatim një plan operacional në funksion të parandalimit të ngjarjeve kriminale, kryesisht kundër krimeve ndaj pronës së qytetarëve, vjedhje me dhunë, etj.

Sipas komunikatës për shtyp, shpërndarë sot nga Policia e Tiranës, operacioni i gjerë që po zhvillohet, i bazuar në Planin Operacional të Drejtorisë së Përgjithshme të Policisë së Shtetit mbi Kontrollin e Territorit, synon rritjen e parametrave të sigurisë si dhe identifikimin dhe kapjen e personave që mbajnë armë zjarri, armë të ftohta pa leje.

Gjithashtu, operacioni është shtrirë dhe ndaj atyre personave që kanë konsumuar shkelje administrative në bazë të Kodit Rrugor, për ato shtetas që qarkullojnë me automjete pa targa, me targa të huaja dhe pa dokumentacionin e nevojshëm ligjor.

Në këtë kuadër, përgjatë 24 orëve të fundit strukturat e Policisë së Kryeqytetit kanë bllokuar 187 automjete për mangësi në dokumentacion, janë sekuestruar 10 armë zjarri të llojeve të ndryshme (shotgan, çifte, pistoleta TT) si 10 armë të ftohta pa leje. Ndersa, janë arrestuar në kushtet e flagrancës 3 shtetas për prodhim dhe shitje të lëndëve narkotike.

HermesNews - ©2013

Dërgo me email | Stampo artikullin