05/03/2013 18:05:47

Drejt dixhitalizimit të plotë të sistemit ligjor

Objektivi ynë kryesor, tha Halimi, është përparimi i Shqipërisë drejt një shoqërie të bazuar në njohuri nëpërmjet një zhvillimi të qëndrueshëm që të çon drejt një shoqërie ku të gjithë qytetarët përfitojnë nga teknologjitë e informacionit

DURRËS - Prioritet i punës së Ministrisë së Drejtësisë ka qenë dhe do të vazhdojë të jetë dixhitalizimi i të gjithë mozaikut të sistemit të drejtësisë.

Kështu u shpreh ministri i Drejtesisë, Eduard Halimi, gjatë Konferencës rajonale me temë "Ndërtimi i Kapaciteteve dhe Edukimi”, organizuar sot në Hotel "Adriatik" në Durrës. Duke folur në Konferencë, ministri Halimi u shpreh se "Shqipëria është duke përjetuar momente të rëndësishme për realizimin e aspiratës së integrimit europian, një proces që është duke u shoqëruar me reforma të rëndësishme dhe që po e transformojnë vendin, në një vend të përparuar, me sisteme të integruara, dhe që për disa procese vendoset në një pozicion të favorshëm ne rajon dhe në vendet e BE".

Objektivi ynë kryesor, tha Halimi, është përparimi i Shqipërisë drejt një shoqërie të bazuar në njohuri nëpërmjet një zhvillimi të qëndrueshëm që të çon drejt një shoqërie ku të gjithë qytetarët përfitojnë nga teknologjitë e informacionit dhe të komunikimit me qëllim shtimin e njohurive, rritjen e efektshmërisë dhe të transparencës në administratën publike.

"Gjatë vitit të kaluar kemi zhvilluar një reformë radikale, duke transformuar ZRPP-ne nga sportelet e korruptuara dhe të burokracisë shtetërore të vitit 2005 në sportele tërësisht të dixhitalizuar online. Shërbimi ndaj qytetarit ka qene objektivi ynë kryesor. Portali i ri për shërbimet online nga ZRPP është unik në rajon", tha Halimi, ndersa nënvizoi se dhe reforma e dixhitalizimit të noterisë dhe sistemit "ONE STOP SHOP-Për Noterët", ka qenë një nga reformat më thelbësore në reformimin e Zyrës së Regjistrimit të Pasurive të Paluajtshme.

Konferenca, e mbajtur sot në Durrës, ku merrnin pjese zyrtarë të lartë nga vendet e rajonit, kishte si qëllim shkëmbimimin e ideve, për të hapur mundësi të reja të bashkëpunimit rajonal, si me projekte të reja, ashtu dhe me ndarjen e informacionit në fusha te ndryshme si në fushën e turizmit, kulturës, emergjencave civile, mbrojtjen e ambientit, etj.

HermesNews - ©2013

Dërgo me email | Stampo artikullin