04/03/2013 17:16:57

Të vëzhgosh pa gjykuar

nga Doriana Metollari

HermesNews - Një psikolog italian i quajtur Rafaelle Morelli, ka një teori të tijën. Më duket një rregull shumë i thjeshtë dhe i drejtë për të gjithë ata që duan të arrijnë në një fazë, në mos lumturie, paqeje të brendshme.

Mësohu ta jetosh realitetin duke e vëzhguar dhe pa e gjykuar.

Një thënie sa origjinale aq dhe e vështirë. A jemi aq të fortë sa të vëzhgojmë gjithçka çfarë ndodh rreth e rrotull nesh pa u transformuar në një influencë jo pozitive kundrejt asaj çfarë realisht kemi nevojë ? Të paragjykosh të tjerët do të thotë t'i mirëpresësh dhe ndaj vetvetes. Eshtë kjo ajo që doni ?

Ka shumë arsye pse mendoj se Morelli ka influenca dhe të besime kryesisht aziatike, brenda formulave të një psikologjie të tijën, por mbi të gjitha diçka më pëlqen. Ai nuk jep receta, nuk mendon se di shumë, dhe as që di pak. Përpiqet të çelë trurin njerëzor nëpërmjet njohjes së vetvetes duke i lënë të lira shqisat dhe energjinë me të cilën jemi gatuar dhe jeton secili prej nesh.

Të mos gjykosh shumë nuk është vetëm një kursim kohe. Automatikisht spostojmë vëmendjen brenda asaj që na intereson më shumë.Thashethemet e së nesërmes me siguri që joshin para një filxhani të ngrohtë më kapuçino, por unë mendoj se më shumë se kaq, është instinkti dembel i yni që bën një hap para në këtë rast.

Njerëzit, i quajnë të "mërzitshme" bisedat mbi çështje që transformojnë realitetin tonë të përditshëm, mbi vendimarrjet tona sepse nuk duan të vrasin trutë dhe është më shumë argetuese kur kritikat drejtohen mbi dikë jashtë masës dhe jashtë nesh. Frikë ? Po, frikë nga jeta e vërtetë.

Por nëse vendosni të dilni jashtë kësaj rutine dhe t'a bëni këtë hap, tjetri është ai i të mos "dëgjuarit" se çfarë do të thonë për ju. Lijini pranë këndit të harresës, për t'i derdhur në koshin e plehrave sa herë që t'ju vijë për mbarë, të gjitha paragjykimet që do t'ju drejtohen. Në momentin që ju vendosni të mos gjykoni atë që ju rrethon, jeni disa herë më të fortë se gjithçka tjetër që është jashtë jush. Pak, por e sigurt.

HermesNews - ©2013

Dërgo me email | Stampo artikullin