04/03/2013 16:42:01

Deputetët përplasen në Parlament për tenderin e Llotarisë kombëtare

Opozita deklaroi sot në Kuvend se pasi të vijë në pushtet do të anullojë tenderin për dhënien e licensës së llotarisë kombëtare kompanisë austriake Austrian Lotteries

TIRANË - Ministri i financave, Ridvan Bode, tha sot në Kuvend se "tenderi për Llotarinë Kombëtare është zhvilluar në mënyrë transparente dhe është monitoruar nga qendrat më me eksperiencë në Europë dhe botë".

Duke hedhur poshtë akuzat e Partisë Socialiste se kompania Austrian Lotteries ishte vendosur të shpallej fituese para se të zhvillohej tenderi, Bode tha se "Llotaria Kombëtare është monpol dhe shteti ka sovranitetin e përdorimit të këtij tagri".

"Ne jemi vendi i fundit që miratojmë Llotarinë Kombëtare. Vitet e fundit gjithnjë e më shumë llotaritë kombëtare i janë besuar privatëve apo edhe në rastet që ju përmendni siç janë Britania e Madhe, apo vende të tjera, u kanë deleguar organizimin dhe ushtrimin e llotarisë kombëtare kompanive private. Licenca është monopol apo jo diferenca mes asaj që ndodh në Austri dhe asaj që ndodh në Shqipëri është fakti se në Shqipëri është një licencë e akorduar me 100 për qind pronësi private, ndërsa në Austri ka përbërje të pronësisë publike dhe private", tha Bode.

Ministri Bode u shpreh se "nuk është e vërtetë që kapitalet e llotarisë së Austrisë janë tërësisht shtetërore, pasi aty marrin pjesë bankat, kazinotë, lojërat e fatit, llotari të tjera si dhe bën pjesë edhe qeveria austriake. Pra formimi i kapitalit për të ndërtuar një llotari kombëtare është i ndryshëm dhe në vende të tjera, edhe pse ju i quani shtetërore ato përsëri janë me kapitale private ose të huaja".

Ai deklaroi më tej se në vendin tonë "2,2% e xhiros do të shkojë për të mbështetur individë me sëmundje specifike, sportin e shumë kategori të tjera".

Opozita deklaroi sot në Kuvend se pasi të vijë në pushtet do të anullojë tenderin për dhënien e licensës së llotarisë kombëtare kompanisë austriake Austrian Lotteries. Sipas deputetëve socialistë, llotaria kombëtare është shitur kundrejt një çmimi qesharak, duke u favorizuar kështu kompania fituese.

Një arsye tjetër, që justifikon qëndrimin kundër të opozitës ndaj kësaj kontrate, është përpilimi në mënyrë të tillë, që përjashton çdo mundësi ndryshimi në përmbajtje të saj, duke bërë që kjo kompani të monopolizojë gjithë tregun, duke shmangur çdo konkurrencë të mundshme.

Deputeti i PS, Arben Malaj, deklaroi se kjo kontratë është e disfavorshme për biznesin. Ai shtoi se "Austrian Lotteries ka imponuar një kontratë përçmuese, pasi në disa pika të saj, thuhet se autoritetet shqiptare nuk mund të revokojnë, ndryshojnë dhe pezullojnë pjesërisht apo plotësisht pjesë të kësaj kontrate. Kjo kompani ka nënshtruar ministrinë".

HermesNews - ©2013

Dërgo me email | Stampo artikullin