04/03/2013 16:07:32

Rriten shitjet e banesave në Tiranë

Ulen me 25% çmimet për blerjen e banesave

TIRANE - Tregu i shitjes së apartamenteve në dy muajt e parë të vitit në Tiranë ka nisur të ringrihet pasi agjentët imobilarë vërejnë rritje të kërkesave nga qytetarët. Nëpër agjenci imobiliare thonë se kërkesat janë rritur në këtë fillimviti për apartamente kryesisht 2+1 në zonën brenda unazës, ku çmimet variojnë deri në €80 mijë. Ulja e çmimeve të shitjeve nga ndërtuesit e kanë favorizuar këtë treg dhe qytetarët mendojnë se është momenti i duhur dhe kërkojnë t'a shfrytëzojnë edhe duke negociuar sipas shitësve të pronave të banesave.

Nga agjenci të ndryshme imobiliare mësohet se çmimet janë ulur deri në 25% për apartamentet ndaj dhe klientët këshillohet të blejnë shtëpi, ku pjesa kryesore bëhet me lekë në dorë, duke shmangur sistemin bankar, i cili është kursyer në dhënien e kredive për shtëpi, në kushtet kur ka mungesë të hipotekave për shumë godina me apartamente të reja.

Zonat e preferuara për të blerë apartamente janë pranë qendrës në Unazën e vogël, në zonën përreth Liqenit dhe më pak në periferi, si zona që ofrojnë çmime të favorshme, jo shumë të larta. Sipas agjencive imobiliare, blerësit janë kryesisht vendas. Kërkesat nga emigrantët vijnë kryesisht nga ata që jetojnë në vende të paprekura nga kriza ekonomike.

HermesNews - ©2013

Dërgo me email | Stampo artikullin