04/03/2013 11:51:08

Greqia pezullon autobuzët shqiptarë

Shoqatat e transporteve protestojnë: do të dyfishojmë kostot

KAKAVIJE - Të paktën 22 linja të autobuzëve ndërkombëtare Shqipëri-Greqi kanë protestuar sot në Kakavije, rreth 25 km larg Gjirokastres, për shkak të vendimit të autoriteteve greke për të bllokuar lëvizjen e tyre drejt shtetit helen.

Ali Dyrmishi, kryetari i Shoqatës së Transporteve, tha se një veprim i tillë jo vetëm do të dërgojë drejt falimentit kompanitë shqiptare, por edhe do t’u dyfishojë apo trefishojë kostot e udhëtimit udhëtarëve, të cilët do të jenë të detyruar ta bëjnë udhëtimin me dy apo tri ndalesa.

“Kjo njëanshmëri e palës greke ka nje vit që në na pezullon linjat e transportit me Greqinë, për të mbrojtur interesat e një grupi të vecantë të palës së saj, për të mbajtur monopol linjat ndërkombëtare mes Shqipërisë dhe Greqisë”, pohoi Dyrmishi. Sipas tij, ky veprim i autoriteteve greke dëmton liberalizimin e transportit publik kombëtar.

“Jemi të vendosur të vijojmë protestën, pasi nuk kemi çfarë të humbasim më, pasi kompanitë shqiptarë në bazë të këtyre licencave kane kryer investimet”, tha Dyrmishi, ndërsa nënvizoi se liberalizim do thotë t’i shërbejmë sa më shpejt klientëve, si në cilësi ashtu edhe në çmim.

Ndërprerja e punës, vijon Drymishi, nuk cënon vetëm bizneset tona, por do të krijojë vështirësi e probleme në shërbimin ndaj qytetarëve. “Me dëshirën e mirë për rifillimin e punës, ne qëndrojmë në pritje të zgjidhjes së kërkesës sonë”, përfundoi Dyrmishi.

HermesNews - ©2013

Dërgo me email | Stampo artikullin