02/03/2013 19:05:59

Kë ndjekin gazetarët ?

nga Doriana Metollari

HermesNews - Një prej atyre pikave të arta të cilat formojnë një gazetar sot është dhe ndjekja e publikut të vet online. Për shumë arsye. E para sepse është një mënyrë e të përmirësuarit të pikëpamjeve të tij dhe e dyta sepse secili prej nesh kudo që shkruan, internet, shtyp, tv, radio, ka një target që i drejtohet dhe i vetmi vend ku ky target e arrin është interneti në profilin apo faqen e gazetarit.

A ka arsye të tjera ? Me siguri që po. Nëse nuk duam të shkruajmë vetëm për veten tonë, atëherë duhet t'i ndjekim lexuesit online. Një gazetar "përplaset" kudo me lexuesit e vet, deri dhe në një kafe jashtë, por asnjëherë nuk mund ta dijë se çfarë mendojnë ata që ndodhen jashtë territorit, nëse nuk i krijon një mjet për të qënë në kontakt.

Gazetarët ndjekin këdo, por rrallë shumë rrallë mbajnë vesh nga auditori. A nuk ka ardhur koha që kjo të ndryshojë ? Do të na jepte më shumë pavarësi në profesion, do të krijonte një koncept më të evoluar për lajmin dhe besoj se do të krijonte brenda secilit atë dëshirë të brendshme për t'u shkëputur nga këndet territoriale gjeografike të informacionit.

E them këtë, sepse e para e besoj, meqë punoj online dhe mund të jem kudo brenda pak kohësh: kjo më jep një vizion tjetër që përpiqem t'a qartësoj duke ndjekur lexuesit e mi online. Ata janë gjithmonë aty dhe me siguri vënë re, kritikojnë, qoftë një "l" të tepërt apo të mangët. Më pëlqen.

Më pëlqen sepse nëse nuk do ta bënin, nuk do t'u interesoja. Por gjithsesi, mesazhi im është ku e ku më i gjerë se kaq. Opinionit publik, ne i dedikojmë punën dhe energjinë, por kjo gjë rrezikon disa herë ta na fusë në një vetëkënaqësi izoluese. Të lexosh atë çfarë mendojnë realisht të tjerët për atë që ti bën, mund t'ju pëlqejë...nervozojë...befasojë. Por gjithsesi, jepjani vetes këtë shans, unë e kam bërë.

HermesNews - ©2013

Dërgo me email | Stampo artikullin