01/03/2013 18:32:21

PS, shqetësohemi për ushqimet

Ilir Beqja pohon se zinxhiri i prodhimit të ushqimeve apo rritjes së bimëve dhe gjësë së gjallë, 'lihet totalisht jashtë kontrollit'

TIRANË - Partia Socialiste reagoi sot duke shprehur shqetësim për cilësinë e ushqimeve që konsumohen, pas publikimit të lajmit për nivel të lartë të alfotoksinës në qumësht, apo praninë e hormoneve të dëmshme Boldemec tek mishi që tregtohet në vend.

Sipas sekretarit për programin në partinë Socialiste, Ilir Beqja, “shqiptarët po ndjehen gjithmonë e më të pasigurt e të pambrojtur në jetën e tyre të përditshme. Por ndërsa deri me sot pasiguria lidhej me aksidentet rrugore, krimet, vjedhjet dhe dhunën në familje, tani është shfaqur edhe një tjetër pasiguri”, tha ai.

Përfaqësuesi socialist shtoi më tej se “i gjithë zinxhiri i prodhimit të ushqimeve apo rritjes së bimëve dhe gjësë së gjallë, po lihet totalisht jashtë kontrolli, duke sjellë në fund këto pasoja me të cilat sot na duhet të përballemi, pasoja që rrezikojnë seriozisht shëndetin e çdo shqiptari që konsumon dhe ushqehet”.

HermesNews - ©2013

Dërgo me email | Stampo artikullin