28/02/2013 18:00:06

Banka, 2013-ta aktivitet te ulet ekonomik

Ekonomia shqiptare u rrit poshtë potencialit të saj në 2012 dhe me hendek negativ në prodhim, evidenton Banka e Shqiperisë në raportin e fundit të saj

TIRANE - Rritja ekonomike këtë vit do të vijojë të jetë e kushtëzuar nga ecuria e ekonomisë botërore, e partnerëve tregtarë, nga natyra e politikës fiskale dhe rritja e produktivitetit, për të cilat Banka e Shqipërisë konstaton se aktiviteti ekonomik pritet të vijojë të jetë i dobët gjatë 2013-tës.

BSH vëren se aktiviteti ekonomik do të vijojë të mbështetet tek rritja e eksporteve neto, që pritet të jenë në masë më të ulët nga viti 2012, çka lidhet me vlerësimet joinkurajuese për aktivitetin ekonomik në vendet partnere, por dhe si reflektim i shkallës së ulët të diversifikimit të eksporteve shqiptare. Gjithashtu, sivjet edhe kërkesa e brendshme pritet të mbetet në nivele të ulëta, si reflektim i dobësisë në konsum dhe investime private, ndërsa pritet kontribut pozitiv nga sektori publik.

Banka e Shqipërisë vlerëson se me probabilitet 90%, inflacioni i çmimeve të konsumit parashikohet të luhatet në intervalin 0.8 – 3.8% pas 12 muajsh, si vlerësim mbi vazhdimësinë e hendekut negativ të prodhimit, presione të dobëta nga çmimet në tregjet botërore dhe pritje të ankoruara të agjentëve ekonomikë.

Ekonomia shqiptare u rrit poshtë potencialit të saj në 2012 dhe me hendek negativ në prodhim, evidenton Banka e Shqiperisë në raportin e fundit të saj.

Sipas BSH, në drejtim të kërkesës, rritja ekonomike u mbështet kryesisht nga rritja e eksporteve neto, ndërsa u vu re se kërkesa e brendshme dha kontribut të vogël. Shkëmbimet tregtare në mallra në 3-mujorin e fundit të 2012-tës eksportet arritën një rritje vjetore prej 12% dhe me rënie vjetore të importeve 9.5%. Për pasojë, deficiti tregtar nominal u ngushtua me 20.1% në terma vjetorë, duke siguruar kontribut pozitiv në rritjen e kërkesës agregate në 3-mujorin e fundit të vitit që shkoi.

Por BSH vëren se kërkesa e brendshme mbeti e plogët, si pasojë e hezitimit të konsumatorëve dhe bizneseve për të konsumuar dhe investuar. Edhe kushtet e kreditimit vijuan të ishin të shtrënguara, pasojë e kujdesit të lartë të bankave për kredidhënien.

Shpenzimet buxhetore në 2012 ranë me rreth 0.3% në terma vjetorë, si pasojë e tkurrjes së shpenzimeve kapitale. Me rënie rezultuan edhe të ardhurat e mbledhura gjatë vitit që shkoi, çka çoi në reduktimin e deficitit buxhetor me rreth 1.2% në krahasim me vitin 2011.

Pavarësisht, BSH vëren se politika fiskale fitoi natyrë stimuluese në 3-mujorin e katërt të 2012-tës, duke treguar rritjen me 35% të deficitit buxhetor. Gjatë vitit 2013 ndonëse në terma të ulët, shpenzimet publike pritet të kenë një kontribut pozitiv në aktivitetin ekonomik, thanë burimet e BSH-së.

HermesNews - ©2013

Dërgo me email | Stampo artikullin