28/02/2013 17:18:05

Opozita kërkon dorëheqjen e Ministrit të Brendshëm pas vrasjes

Tahiri, me vrasjen e Lamajt policia është ndjerë e tradhtuar, së pari nga eprorët e saj

TIRANË - Opozita socialiste kërkoi të enjten në Kuvend që ministri i Brendshëm, Flamur Noka, të japë dorëheqjen pas publikimit të një fotoje ku paraqiten drejtues të lartë të policisë së bashku me Arben Frrokun, i dyshuari kryesor për vrasjen e kryekomisar Dritan Lamaj, më 24 shkurt. Deputeti i PS-së, Samir Tahiri, tha se me vrasjen e Lamajt policia është ndjerë e tradhtuar, së pari nga eprorët e saj. "Jeni ministri i parë që po varrosni kaq shumë komisarë dhe i fundit në luftën kundër krimit. Jepni dorëheqjen dhe çojini këta të katër para drejtësisë dhe të hetohen për vrasjen e Dritan Lamajt", iu drejtuar Tahiri ministrit Noka. Sipas tij, katër drejtuesit e policisë kanë lidhje me lëvizjen nga detyra si shef komisariati të Dritan Lamajt. "Tradhtia ka nisur në zyrat e qeverisë për t'i hapur rrugën konsumimit të një krimi", tha ai. Duke iu referuar dorëheqjes nga hetimi i vrasjes së Dritan Lamajt, të dy zyrtarëve të Policisë, Agron Kuliçajt dhe Tonin Vocaj, deputeti i PS-së, tha se kjo nuk është e besueshme. "Kush beson se ata do të heqin dorë nga hetimi dhe në fakt nuk do t'i imponohen hetimeve", tha Tahiri.

HermesNews - ©2013

Dërgo me email | Stampo artikullin