27/02/2013 12:29:22

Aflatoksina: analiza qumeshtit me substanca kancerogjene

Pipero, asnjë indikacion se në Shqipëri është konsumuar qumësht i kontaminuar

TIRANË - Ministria e Shëndetësisë ka vënë në gatishmëri kapacitet e saj lidhur me çështjen e kontaminimit të qumështit me aflatoksinë dhe ndikimet e deritanishme në shëndetin e qytetarëve.

“Nga pikëpamja epidemiologjike do të hetohen të gjithë rastet me cirrozë të heparit dhe kancer për të shqyrtuar bashkëshoqërimin midis konsumimit të qumështit (sasia, lloji etj) dhe patologjisë së shfaqur”, tha sot drejtori i Politikave Shëndetësore në MSH, Pëllumb Pipero.

“MSH ka vënë në gadishmëri dhe në dispozicion kapacitetet e saj që lidhen me toksikologjinë klinike, onkologjinë, hetimin epidemiologjik, shërbimet laboratorike të referencës në Institutin e Shëndetit Publik dhe specialistët e fushave të tjera të lidhura, për të qartësuar cështjen e kontaminimit të qumështit me aflatoksinë dhe ndikimet e deritanishme në shëndetin e qytetarëve”, tha Pipero në një konferencë për mediat.

Pipero theksoi se “deri tani nuk kemi asnjë të dhënë që të konfirmojë hipotezën se në Shqipëri është konsumuar qumësht i kontaminuar, me pasojë shfaqjen e patologjive kronike, përfshirë kancerin”.

Aflatoksinat janë lëndë toksike të prodhuara nga disa kërpudha të gjinisë Aspergillus dhe ndahen në 4 nëntipe, nga të cilat vetëm njëra është mjaft toksike (Aflatoksina B1). Kërpudhat rriten në ushqimet e mykura që mund të konsumojnë bagëtitë dhe më pas këto produkte toksike nga qumështi mund të kalojnë edhe tek njerëzit nëse konsumohet qumësht i pakontrolluar.

Dëmtimet më së shumti lidhen me mëlçinë, duke shkaktuar cirrozë ose kancer të saj, por natyrisht duhet nënvizuar se kjo gjë shkaktohet nëse qumështi konsumohet për një kohë të gjatë, pasi doza që merret prej tij është shumë e vogël për të shkaktuar intoksikacione të menjëhershme (raste të rralla janë raportuar vetëm në kafshë).

HermesNews - ©2013

Dërgo me email | Stampo artikullin