26/02/2013 21:38:53

Ambasadori Kola, raporte të shkëlqyera me Italianë

Intervistë e ambasadorit shqiptar në Itali, Llesh Kola dhënë për mediat italiane

ROMË - Raporte ekonomike solide, vizion politiko-diplomatik i përbashkët, mirënjohje për mbështetjen që Roma i ka dhënë përherë Shqipërisë. Pak ditë nga përfundimi i mandatit të tij, që zgjati gjashtë vjet e gjysmë, ambasadori shqiptar në Romë, Llesh Kola (i cili do të zëvendësohet nga Neritan Ceka.), hedh një vështrim mbi raportet dypalëshe dhe mbi rrugën euro-atlantike të vendit të tij. Raporte që me Italinë, partnerin e parë tregtar të Shqipërisë, janë të shkëlqyera.

''Në vitin 2005 shkëmbimet tregtare mes dy vendeve ishin 893 milionë euro, ndërsa në vitin 2010 arritën në dy miliardë. Rreth 40 për qind e bilancit tregtar të Shqipërisë realizohet falë shkëmbimeve me Italinë, ndërkohë që një e pesta e investimeve të huaja direkte në Shqipëri janë italiane'', thotë ambasadori Kola në një intervistë me ANSAmed-in.

''Sot, kompanitë italiane në Shqipëri janë rritur në 400. Janë forcuar edhe marrëdhëniet mes qytetarëve shqiptarë dhe italianë'', thekson Kola.

''Kriza që ka goditur Italinë ka provokuar një rënie të remitancave nga 900 milionë euro në vitin 2008 në 560 milionë vitin e kaluar'', shton ambasadori.

''Por, ne nuk po shohim një rikthim të shqiptarëve nga Italia për në vendin e tyre, siç po ndodh me shqiptarët që jetojnë në Greqi'', siguron Kola.

''Italia është aleate e madhe dhe mbështetëse e fuqishme e Shqipërisë. Roma na ndihmoi për anëtarësimin në NATO, por edhe për të thjeshtëzuar marrëdhëniet tona me Brukselin për shembull duke dalë garante për ne në dialogun me Bashkimin Evropian për liberalizimin e vizave'', shton ambasadori Kola.

''Nëse Shqipëria nuk ka plotësuar ende kushtet e vëna nga Brukseli për marrjen e statusit kandidat, kjo tregon mungesën e vullnetit politik të Tiranës për të kryer sforcimet e domosdoshme për të bërë pjesë në familjen e madhe evropiane'', thekson Kola.

Ambasadori shqiptar flet për një mungesë përgjegjësie nga ana e opozitës parlamentare, që në momentet e votimit të ligjeve të domosdoshme për kryerjen e reformave të kërkuara nga Brukseli ''nuk ka dhënë mbështetjen e saj për përmbushjen e detyrimeve të kërkuara nga Bashkimi Evropian në fushën e drejtësisë, administratës publike dhe reformës parlamentare''. ''Kjo është e gabuar'', thekson Kola.

HermesNews - ©2013

Dërgo me email | Stampo artikullin