26/02/2013 21:02:04

Vetëvritet i riu, teksa ndiqej nga policia

Policia paralajmëron furgonin të ndalet: shkëmbim zjarri me nje prej pasagjereve

LIBRAZHD - Një shtetas është vetëvrarë, pas një shkëmbimi zjarri me Policinë, në postobllokun në dalje të Librazhdit, në vendin e quajtur Mengël. Sipas policisë, “një furgon pasagjerësh i linjës Elbasan-Prrenjas është paralajmëruar nga postoblloku të ndalojë, por në këtë moment njëri nga pasagjerët ka shtënë me armë në drejtim të Policisë dhe më pas ka hapur derën e furgonit duke zbritur nga ai me vrap”.

Më pas, personi i identifikuar si Përparim Bala, me banim në Bulqizë, ka ndalur një mjet tip Reno, me targë DR 6487 E, dhe më pas i ka i rrëmbyer këtij të fundit mjetin, sqaron policia. Gjithçka ka zgjatur për rreth 30 minuta, ku në ndjekje të autorit janë vënë forca të Policisë së Elbasanit, si edhe të Librazhdit. Policia sqaron se 5 kilometra para se të mbërrinte në qytetin e Librazhdit, në vendin e quajtur “Kthesat e Murrashit”, 23 vjeçari ka dalë nga mjeti dhe ka vrarë veten me armë.

Paraprakisht, policia dyshon se ai mund të jetë njëri nga dy personat që vodhën me maska një argjendari në qytetin e Bulqizës, ngjarje e ndodhur mëngjesin e sotëm. Mësohet se nga shkëmbimi i zjarrit mes autorit dhe policisë nuk ka patur të plagosur nga efektivat e policisë.

HermesNews - ©2013

Dërgo me email | Stampo artikullin