26/02/2013 16:41:02

Informatizimi i tregut të punës do të ul papunësinë

Zbatimi i Sistemi Online do tu japë mundësi punëdhënësve të krijojnë një llogari në sistem, ku mund të publikojnë një vend të lirë pune dhe të kërkojnë për punëkërkues të përshtatshëm si dhe madje t'i dërgojnë ftesë atyre. Nga ana tjetër sistemi i lejon punëkërkuesve që të krijojnë një llogari të tyren në sistem, ku të plotësojnë një CV, si dhe të kërkojnë e të aplikojnë për vende të lira pune sipas profesionit dhe rajonit të tyre

TIRANË - Tashmë të gjithë qytetarët shqiptarë mund të regjistrohen në portalin dixhital të punësimit, për të gjetur një vend pune. Ky portal, mundëson lidhjen e kërkesave të punëkërkuesve me ofertat e punëdhënësve.

Krijimi i portalit, i cili u përurua të martën, ishte një financim prej 500 mijë euro i Qeverisë Suedeze. Në ceremoninë e përurimit Ministri Spiro Ksera e cilësoi dixhitalizimin e shërbimeve të punësimit si një reformë që do të ulë nivelin e papunësisë në vend, si një prioritet i kësaj ministrie.

"Sot ne përfundojmë dixhitalizimin e tregut të punës, një dixhitalizim që do t`i japë një transparencë më të madhe tregut të punës, dhe akses më të madh të punëkërkuesve të papunë si dhe të grupeve të veçanta. Ky dixhitalizim përkon dhe me kriteret e Bashkimit Europian, për të afruar tregun e punës në Shqipëri me atë BE-së", tha Ksera.

Ai shtoi gjithashtu se Ministria e Punës ka bërë përpjekje për të përafruar tregun e punës së Shqipërisë me atë të rajonit.

Informatizimi përfshin në vetvete një version të ri informatik me dy komponentët e saj; sistemin e brendshëm (Intranet) dhe sistemin online (internet). Sistemi është përfunduar dhe instaluar në serverat e AKSHI-t dhe do të fillojë tashmë funksionimin e tij.

Të 36 Zyrat e Punësimit janë pajisur me hardwerin e nevojshëm me Kompjutera, Rack, dhe rrjetin e brendshëm për funksionimin e sistemit informatik. Gjithashtu është zhvilluar trajnimi i stafit për përdorimin e sistemit të ri.

Në Shërbimin e Brendshëm do të mundësohet regjistrimi elektronik i punëkërkuesve dhe punëdhënësve në zyrën e punësimit sipas një formati të përcaktuar. Gjithashtu në të do të regjistrohen elektronikisht vendet e lira të punës dhe do të bëhet një ndërmjetësim automatik i vendit të lirë të punës me punëkërkuesin.

HermesNews - ©2013

Dërgo me email | Stampo artikullin