26/02/2013 16:06:57

Zvarritet proçesi ndaj Dritan Dajtit: mungojnë avokatët

I nisur në fund të vitit 2009 në këtë Gjykatë, proçesi ndaj Dajtit po shoqërohet me ndërprerje të shumta

TIRANË - Vijon të zvarritet procesi gjyqësor ndaj Dritan Dajtit, i akuzuar për vrasjen e katër punonjësve të Policisë së Shtetit në vitin 2009 në Durrës.

Gjykata e Krimeve të Rënda nuk ka mundur as ditën e sotme, që të zhvillojë seancën pasi mungonin avokatët mbrojtës të të pandehurit.

I nisur në fund të vitit 2009 në këtë Gjykatë, proçesi ndaj Dajtit po shoqërohet me ndërprerrje të shumta. Ky proçes numëron rreth 200 seanca të pezulluara, kryesisht për shkak të mungesës së palës mbrojtëse.

Faktikisht, rasti në fjalë u referua si një problem që kërkon zgjidhje dhe në analizen vjetore te Gjykatës së Krimeve të Rënda, mbajtur një ditë me parë.

Kreu i kësaj Gjykate, Sander Simoni, pranoi se Gjykata është vënë në vështirësi që procese të veçanta vazhdojnë të jenë të bllokuar me gjithë përpjekjet dhe angazhimet e gjykatës për ta zhvilluar atë në mënyrë të pandërprerë, ndërsa theksoi se, për zhbllokimin e kësaj situate, gjykata ka kërkuar ndërhyrjen e Autoritetit të Dhomës së Avokatisë Tiranë dhe Dhomës Kombëtare të Avokatisë.

"Detyra jonë është zbatimi i ligjit procedural penal, që do të thotë ruajtje e integritetit të procesit gjyqësor penal, e solemnitetit të tij nga sjelljet jokorrekte të palëve, por dhe t'u krijojmë palëve mundësitë e duhura ligjore, proceduriale për të ushtruar funksionin e tyre, në rastin në fjalë mbrojtjen", tha Simoni.

"Shpresojmë që me ndryshimet që i janë bërë ligjit per avokatinë, për thjeshtimin dhe bërjen efektive të procedimit disiplinor të avokatëve, të ketë impakt në disiplinimin e sjelljes së tyre në dobi të autoritetit të Gjykatës dhe integritetit të procesit gjyqësor penal, shtoi me tej Simoni.

I pandehuri Dritan Dajti akuzohet se është autor i vrasjes me armë zjarri të katër efektivëve të Policisë së Shtetit, gjatë operacionit për arrestimin e tij në 7 gusht të vitit 2009, në plazhin "Iliria" në Durrës.

HermesNews - ©2013

Dërgo me email | Stampo artikullin