25/02/2013 11:33:46

KQZ/ Miratohen modelet e vulave

Gati modelet për komisionet e mësipërme mbështetur në kriteret e parashikuara në dy vendime të Këshillit të Ministrave, të viteve 1993 dhe 1995

TIRANË - Komisioni Qendror i Zgjedhjeve (KQZ) miraton me konsensus katër modelet e vulave që do të përdoren në zgjedhjet e 23 qershorit nga komisionet zonale të administrimit zgjedhor(KZAZ), komisionet e qendrës së votimit (KQV) dhe kryetari i KQV-së dhe të vulës rezervë për KQV-të.

Modelet e vulave u përgatiten sipas kritereve të parashikuara në dy vendime të Këshillit të Ministrave, (1993 dhe 1995), të cilat përcaktojnë rregullat e prodhimit, administrimit, kontrollit dhe ruajtjes së vulave zyrtare.

KQZ miratoi me 7 vota pro dhe vendimin për shpërndarjen e vulave rezervë, në rast dëmtimi ose dalje jashtë QV-së të vulës së kryetarit të komisionit të qendrës së votimit ose të vulës së komisionit të QV-së. Ky tip vule u prodhua për herë të parë në zgjedhjet vendore të 2011-s dhe sasia e tye është e barabartë me numrin e QV-ve.

Mbajtja dhe administrimi i këtyre vulave do të bëhet nga inspektorët rajonalë të KQZ-së. Në rastet e humbjes apo dëmtimit të vulës transportimi i saj do të bëhet nga inspektorët rajonalë të Komisionit Qendror në QV-të ku mund të evidentohet humbja apo dëmtimi i saj.

Në çdo rast, përdorimi i vulës rezervë do të bëhet me vendim të KQZ-së. Në zgjedhjet e 2009-s u përdorën dy vula rezervë, ndërsa në zgjedhjet e 2011-s lindi nevoja për të përdorur tre vula të tilla.

HermesNews - ©2013

Dërgo me email | Stampo artikullin