22/02/2013 17:47:53

Sistemi online i punësimit: si dhe ku ?

Informatizimi i punës, projekt i ri i Ministrisë

TIRANË - Ministria e Punës, çështjeve sociale dhe shanseve të barabarta njofton se së shpejti do të përurohet sistemi i ri online i punësimit. Ky sistem është realizuar me fonde të Qeverisë Suedeze dhe mundëson informatizimin e Shërbimit publik të punësimit në 12 Zyrat rajonale të punësimit dhe 24 Zyrat Vendore të Punësimit.

Informatizimi përfshin në vetevete një version të ri informatik me dy komponentet e saj, Sistemin e brendshëm (Intranet) dhe Sistemin online (internet). Sistemi është përfunduar dhe instaluar në Serverat e Akshit dhe do të fillojë funksionimin sa më shpejt të jetë e mundur.

Të 36 Zyrat e Punësimit janë pajisur me hardwerin e nevojshëm me Kompiutera, Rack, dhe rrjetin e brendshëm për funksionimin e sistemit informatik. Gjithashtu ka filluar trajnimi i stafit për përdorimin e sistemit të ri

Në shërbimin e brendshëm do të mundësohet regjistrimi elektronik i punëkërkuesve dhe punëdhënësit në zyrën e punësimit sipas një formati të përcaktuar. Gjithashtu në të do të regjistrohen elektronikisht vendet e lira të punës dhe do të bëhet një ndërmjetësim automatik i vendit të lirë të punës me punëkërkuesin.

Zbatimi i Sistemi Online do t'u japë mundësi punëdhënësve të krijojnë një llogari në sistem, ku mund të publikojnë një vend të lirë pune dhe të kërkojnë për punëkërkues të përshtatshëm si dhe t'i dergojë ftesë një punëkërkuesi.

Nga ana tjetër sistemi i lejon punëkërkuesve që të krijojnë një llogari në sistem, ku të plotësojnë një CV, dhe të kërkojnë dhe të aplikojnë për vende të lira pune sipas profesionit dhe rajonit të tyre.

HermesNews - ©2013

Dërgo me email | Stampo artikullin