22/02/2013 17:07:21

UT, nisin aplikimet për doktoraturën

UT deri në datën 15 maj pranon kërkesat për aplikim në Programet e studimit të Doktoraturës për vitin akademik 2012-2013

TIRANE - Universiteti i Tiranës (UT) ka hapur proçedurat e aplikimit për doktoraturat. Sipas rektoratit, UT deri në datën 15 maj pranon kërkesat për aplikim në Programet e studimit të Doktoraturës për vitin akademik 2012-2013, në fakultetin e Ekonomisë, Gjuhëve të Huaja, Historisë dhe Filologjisë, Drejtësisë, Shkencave Sociale, Fakulteti i Shkencave Natyrore, Instituti i Studimeve Europiane.

Dorëzimi i dosjes së aplikimit dhe regjistrimi do të zhvillohen pranë sekretarive të Departamenteve përkatëse të strukturave të UT-së nga ora 08.00 - 16.00.

Kandidati duhet të ketë përfunduar Kandidatët që aplikojnë për t’u regjistruar në programin e studimit të doktoratës duhet të plotësojnë kriteret e përcaktura.

Studimet e larta në fushën e kërkuar dhe të zotërojnë Diplomë të ciklit të dytë të studimeve Master i Shkencave, apo çdo diplomë tjetër të barazvlefshme me të ose një diplome të huaj të barazvlefshme të shoqëruar me vërtetimin e njohjes nga MASH; të ketë notë mesatare të përgjithshme 8 e lartë, në secilin cikël studimesh ( i parë dhe i dytë) dhe të zotërojë gjuhën angleze të vlerësuar mbi bazën e një testi të njohur ndërkombëtarisht; të jetë i rekomanduar nga dy persona që gëzojnë titull; të paraqesë në mënyrë të përmbledhur një projekt shkencor mbi të cilin ka menduar të punojë gjatë kursit të Shkollës Doktorale dhe të marrë përsipër përballimin e shpenzimeve të studimeve. Kandidatët aplikojnë për t’u regjistruar në një program studimi doktorate me dosje individuale.

HermesNews - ©2013

Dërgo me email | Stampo artikullin