21/02/2013 11:33:59

Ndërmarrjet italiane në Shqipëri

Si ka ndryshuar aktiviteti ekonomik i tyre ne keto 20 vitet e fundit ?

DURRËS - 230 ndërmarrje, me kapitale italiane, ushtrojnë aktivitetin e tyre ekonomik në qarkun e Durrësit.

Shifra është bërë e ditur në njoftimin për shtyp të Dhomës së Tregtisë dhe Industrisë së Durrësit, e cila organizon sot konferencën “Bashkëpunimi Ekonomik Italo-Shqiptar në Qarkun Durrës".

Referuar këtyre burimeve, numri i përgjithshëm i bizneseve me kapitale të huaja në të gjitha njësitë administrative vendore të qarkut të Durrësit arrin në 342, mes të cilave 230 janë italiane dhe shumica e tyre janë përqëndruar në qytetin e Durrësit dhe në rrethinat e tij.

Shifrat janë shumë të qarta dhe të lënë të kuptosh rëndësinë e madhe të marrëdhënieve mes rajonit bregdetar me Italinë fqinje. Veçanërisht, në një moment të tillë krize financiare dhe ekonomike, të rishikosh marrëdhëniet e deritanishme dhe mbi të gjitha të kërkosh ura të reja bashkëpunimi bëhet një nismë shumë e mirë.

Drejtuesit e Dhomës janë të bindur se në raportet ekonomike të të dy palëve ka shumë burime të pashfrytëzuara, duke filluar nga mosha mjaft e re e forcave të punës në vendin tonë, njohja e gjuhës italiane, si element afrimi dhe biznesi, apo pagat disa herë më të ulta që aplikohen në vendin tonë në raport me Italinë fqinje.

Nëse do të përkthenim interesin e veçantë që ka Durrësi në një marrëdhënie të tillë, së paku do të veçonim numrin e madh të njerëzve të punësuar në ndërmarrjet me kapital italian, por edhe në ato që marrin porosi nga Italia. Do të ndaleshim edhe në traditën e krijuar në vitet 1920-1930 nga marrëdhëniet e ndërsjella të biznesit durrsak me atë të përtej detit.

Situata gjatë 20 vjetëve të fundit ka ndryshuar jo pak/ Shumë pranë hotel "Adriatikut", ku do të zhvillojë punimet konferenca e sotme, në mars të vitit 1991 niseshin në kërkim të një jete më të mirë mijra shqiptarë, të cilët kishin provuar mbi kurriz një nga diktaturat më të egra të Evropës.

Sot, pas 22 vitesh, edhe ata janë një realitet mjaft i rëndësishëm, që bashkë me kursimet e një jete dinjitoze e me punë të ndershme po sjellin nga Italia edhe përvojën e fituar, por shpesh edhe pajisje dhe makineri të nevojshme për bizneset e tyre.

Specialistët e të dy vendeve insistojnë se afërsia mes Shqipërisë dhe Italisë dhe rrugët e panumërta që na bashkojnë, janë një shans shumë i mirë për të instaluar në vendin tonë një pjesë të teknologjive moderne.

Vendi ynë është një alternativë shumë më e mirë se sa vendet aziatike, ku po transferohen më së shumti bizneset italiane. Të rinjtë e shkolluar dhe gjuha italiane e bën tregun shqiptar të punës mjaft joshës.

50.6 për qind i eksporteve shqiptare i drejtohen Italisë, ndërsa nga vendi fqinj mbërrijnë në Shqipëri 30.5 për qind e importeve. Porti i Durrësit shërben për shkëmbimin e 77 për qind të mallrave të importit dhe 89 për qind të eksporteve shqiptare.

Vetëm gjatë vitit të kaluar, mbi 62 mijë kamionë dhe trajlera kanë transportuar afro 700 mijë ton mallra, në të dy anët e urës Adriatike. Oferta e Qeverisë shqiptare, e cila disa javë më parë lançoi vendimin për heqjen e TVSH-së së makinerive të prodhimit për bizneset e huaja, si dhe vendimi për pagesat e kontributeve shoqërore dhe shëndetsore për të rinjtë e punësuar në një periudhë 3-vjeçare, përbëjnë një risi, e cila josh investitorët italianë në vendin tonë, dhe veçanërisht në Durrës.

Konferenca “Bashkëpunimi Ekonomik Italo-Shqiptar në Qarkun Durrës" synon të vërtetojë sërish hipotezën se rritja e shkëmbimeve ekonomike ndërmjet bizneseve italiane dhe shqiptare, është me perfitime për të dy palët, por edhe me një kontribut të ndjeshëm për kapërcimin e vështirësive financiaro-ekonomike të kohëve të sotme.

HermesNews - ©2013

Dërgo me email | Stampo artikullin