20/02/2013 18:36:20

Bashkia, më tepër siguri në rrugën Dritan Hoxha

Semafor i veçantë për kalimin e qytetarëve nga njëra anë në tjetrën të rrugës

TIRANE - Ashtu siç kishte premtuar kreu i Bashkisë Lulzim Basha, në njërin prej akseve më problematikë të kalimit të qytetarëve, pikërisht në rrugën Dritan Hoxha është vendosur një semafor i veçantë për kalimin e qytetarëve nga njëra anë në tjetrën të rrugës.

Prej vitesh, ky aks rrugor ishte kthyer në një problem shqetësues për banorët dhe burim i shumë aksidenteve, me pasojë humbje jetë njerëzish. Drejtoresha e Transportit dhe Lëvizshmërisë, Nereida Hoxha, ka bërë të ditur sot, në një prononcim për mediat, se ky është vetëm një prej 9 semaforëve të rinj që do të vendosen në Tiranë, në kuadër të projektit për Qendrën e Kontrollit të Trafikut.

"Në rrugën "Dritan Hoxha", një ndër akset më të ngarkuar e problematikë sa i përket trafikut është montuar semafori i ri. Ky semafor në këtë nyje është pjesë e 9 semaforëve të rinj që do të vendosen në Tiranë, në kuadër të projektit të Qendrës së Kontrollit të Trafikut. Semafori është i pajisur me të gjithë karakteristikat teknike të nevojshme të një nyje semaforike, me buton gjë që i mundëson kalimtarit kohën e tij. Jo vetëm kaq! Butoni është i pajisur edhe me pajisje për të verbrit. Pra, në këtë mënyrë ne kemi adresuar edhe grupe të tilla të shoqërisë që mund të kalojnë rrugën në mënyrë të sigurt", tha znj. Hoxha.

Ajo bëri të ditur se përveç këtij semafori, në këtë aks është menduar që tek Pallati i Sportit të vendoset një tabelë elektronike me mesazhe të ndryshueshme. Kjo tabelë elektronike gjatë gjithë kohës do të shfaqë mesazhe: "Kujdes këmbësorët!". Të dy këto kalime do të pajisen me sinjalistikë vertikale dhe horizontale.

Në Tiranë ka edhe akse të tjera problematike, siç është ai i Unazës së Re, ku aktualisht sot e në vijim do të punohet për të montuar nyje të reja semaforike.

Drejtoresha e Transportit dhe Lëvizshmërisë bëri të ditur se semafori është i pajisur me kamera që do të lidhen me Qendrën e Kontrollit të Trafikut, për të monitoruar 24 orë trafikun në këtë segment.

Ky aks do të pajiset me kangjella, të cilat do të mundësojnë që kalimtarët të kalojnë vetëm në këto kalime të sigurta, duke kontribuar kështu në reduktimin e aksidenteve.

HermesNews - ©2013

Dërgo me email | Stampo artikullin