20/02/2013 10:33:52

Indi, Cameron viziton tempullin e masakrave koloniale

Cameron pritet të udhëtojë drejt Amritsar, në Panxhap në veriperëndim të vendit, ku ndodhet tempulli i shenjtë i fesë Sikhs dhe që ishte arena e një masakre në vitin 1919

AMRITSAR - Kryeministri britanik, David Cameron pritet të përfundojë sot vizitën e tij në Indi me një vizitë të papritur në vendin e një masakre të kryer nga trupat angleze gjatë epokës koloniale, për të shprehur për herë të parë keqardhjen në emër të vendit të tij.

Gjatë kësaj vizite, që nuk ishte e parashikuar në programin zyrtar të këtij turi tre ditor në Indi, Cameron pritet të udhëtojë drejt Amritsar, në Panxhap në veriperëndim të vendit, ku ndodhet tempulli i shenjtë i fesë Sikhs dhe që ishte arena e një masakre në vitin 1919.

Sipas burimeve vendase, ai do të vizitojë Tempullin e Artë para se të shkojë në Jallianwala Bagh, një kopsht në qendër të qytetit, ku më 13 prill të vitit 1919 ushtarë britanikë hapën zjarr kundër pjesëmarrësve të një proteste politike paqësore duke vrarë qindra indianë. Ky episod, i njohur si "Masakra e Amritsarit" figuron ende në tekstet shkollore në Indi.

HermesNews - ©2013

Dërgo me email | Stampo artikullin