18/02/2013 19:26:58

Internet Banking, 236 mijë tansaksione

Shërbimet 'internet banking' pas hedhjes në treg në vitin 2005 nga një bankë e vetme, në fund të vitit 2012, shërbimet 'home banking' ofrohen nga të gjitha bankat

TIRANË - "Internet banking" një shërbim i ri që po aplikojnë bankat tregtare në vend, duket se po merr shtrirje gjithnjë e më të të madhe të përdorimit nga klientë të ndryshëm, numri i të cilëve po shtohet me ritme të përshpejtuara.

Banka Qendrore vëren se, shërbimet "internet banking" pas hedhjes në treg në vitin 2005 nga një bankë e vetme, në fund të vitit 2012, shërbimet "home banking" ofrohen nga të gjitha bankat. Sipas të dhënave zyrtare, gjatë vitit 2012 janë kryer më shumë se 236 mijë transaksione përmes internetit, ku kryesisht kanë qenë blerje online në kompanitë e mëdha të veshjeve.

Ndërkohë që përhapja e këtyre shërbimeve shënoi një rritje vjetore prej 26% krahasuar me një vit më parë dhe vlera e transaksioneve u shtua 15% krahasuar me vitin 2011. Dinamika e zhvillimit të këtij shërbimi ka nisur të jetë shumë aktiv në vitin 2009, pikërisht në fillimin e krizës ekonomike dhe shtimi i numrit të kartave të kreditit është arsyeja kryesore që ka nxitur transaksionet përmes internetit.

Këto lloj formash përdoren kryesisht nga klientët me të ardhura të mesme dhe të larta, të cilët kanë edhe më shumë njohuri në mënyrat e përdorimit dhe hapësirat për të blerë online. Ekspertët shprehen se reduktimi i parasë "CASH" është një tjetër ndikim pozitiv në këtë drejtim që ka sjellë përfshirjen e shumë pagesave të shërbimeve të ndryshme në internet apo përmes bankës.

Kompanitë e shërbimeve utilitare shtetërore e private kanë ofruar një kanal shtesë për mbledhjen e pagesave, duke lehtësuar këtë proces, duke ulur kostot operative dhe duke krijuar kanal shtesë komunikimi me klientët e tyre.

Prakticiteti dhe menaxhimi i kohës ka sjellë për konsumatorët tashmë një përvojë të re, krejt ndryshe nga ajo e mëparshmja me qëndrime në radhë, në qendra pagesash që hapen vetëm në ditët e javës me orare të kufizuara. Ata mund të shërbehen për këto pagesa në kohë reale, 24 orë në 7 ditët e javës, edhe gjatë festave pa pagesa shtesë për çdo faturë të paguar.

HermesNews - ©2013

Dërgo me email | Stampo artikullin