13/02/2013 12:16:38

Selami, kandidat i PD-se

I pyetur nëse është pjesë e strukturave formale të PD, Selami tha se 'sipas statutit, unë kam qenë kryetar i PD-së dhe aktualisht jam anëtar i Këshillit Kombëtar të PD-së'

TIRANË - Ish-kryetari i Partisë Demokratike, Eduard Selami, deklaroi në një intervistë televizive se ,"jam i gatshëm të kandidoj për Partinë Demokratike në zgjedhjet parlamentare të 23 qershorit".

I pyetur nëse është pjesë e strukturave formale të PD, Selami tha se "sipas statutit, unë kam qenë kryetar i PD-së dhe aktualisht jam anëtar i Këshillit Kombëtar të PD-së".

"Fakti që vazhdoj të mbështes edhe me këtë intervistë PD-në, besoj në një fitore të mundshme të PD-së në zgjedhjet e ardhshme. PD është një parti elektorale dhe koha e partive të vjetra ka kaluar. Unë ndihem fare pranë PD-së, edhe pse jam larg Shqipërisë. Unë takohem me të zgjedhur, me anëtarë të PD-së, jam takuar dhe me zotin Berisha në vizitën e mëparshme", tha Selami.

Selami theksoi se, "asnjëherë nuk jam larguar përfundimisht nga politika. Nuk është se në çdo fushatë që vjen me zor pres të afrohem. Në fushatat e mëparshme kam patur kontakte, sugjerime, por asnjëherë nuk janë materializuar. Nuk mund të them se ka munguar dëshira ime, por pozicioni im ndoshta është delikat", u shpreh Selami.

I pyetur për shanset që PD të fitojë një mandat të tretë ai tha se "para elektoratit del kjo forcë politike me një bilanc pozitiv. Nuk mund të bëhet gjithçka në qeverisje. Do të jetë e vështirë, por e mundur mandati i tretë. E rëndësishme është që shqiptarët të vendosin me votën e tyre".

Duke komentuar zhvillimet politike në Shqipëri, Selami tha se, "të gjithë duhet të jemi krenar për çka ka arritur Shqipëria". "Pavarësisht të metave, klasa politike ka gjithashtu meritat e saj", u shpreh Selami.

Duke folur për mundësinë e fitores së një mandati të tretë qeverisës të PD-së, Islami tha se, " forca e re politike e dalë nga PD, Fryma e Re Demokratike, nuk do të ndikojë me votat e saj në rezultatin zgjedhor të 23 qershorit".

Ish-kryetari i PD-së, Selami, u shpreh gjithashtu se, nëse do të angazhohej në politikë forca së cilës i përkas është PD, s’ka pasur asnjë mëdyshje për këtë dhe nëse kjo parti do më ftonte për të kontribuar në këto zgjedhje do ta pranoja me kënaqësi ftesën.

HermesNews - ©2013

Dërgo me email | Stampo artikullin