13/02/2013 03:59:20

Zbardhet pjeserisht vendimi i Gjykatës

Dosja '21 Janari'

TIRANE - Firmoset dosja "21 Janari" nga Trupi gjykues që para pesë ditëve dha vendimin për një prej çështjeve më të diskutuara të mandateve Berisha 1 dhe 2.

Në dokumentin me rreth 40 faqe publikuar pjesërisht nga mediat, shpjegohen arsyet pse Gjykata shpalli pafajësinë për kreun e gardës, gjeneral Ndrea Prendi dhe për komandantin e njësisë speciale, oficerin Agim Llupo.

- Gjykata argumenton se akuza e vrasjes në rrethana cilësuese ndaj dy të akuzuarve të prokurorisë nuk qëndron në mënyrën se si është formuluar nga prokuroria, atë për dashjen e të pandehurve për të vrarë.

- Trupi gjykues nuk mohon që në 21 janar mbetën të vrarë Ziver Veizi, Hekuran Deda dhe Faik Myrtaj, por nuk ka elementë të akuzës së vrasjes me dashje, pasi nuk u provua se të pandehurit njiheshin me viktimat.

- Sipas Gjykatës, nuk mund të ketë akuzë tjetër të seksionit të vrasjeve, sikurse janë akuzat e vrasjes nga pakujdesia, vrasje në kushtet e tronditjes së fortë psikike, apo vrasjes në kapërcim të mbrojtjes së nevojshme.

- Gjykata pranon ekspertizën e Byrosë Federale të Hetimit, duke arsyetuar në dy faqe të vendimit se prova kryesore e gjykimit të dosjes “21 janari” është pikërisht kjo ekspertizë.

- Gjykata deklaron se e merr në konsideratë këtë provë dhe se nëpërmjet saj Gjykata ka krijuar bindjen se plumbi që ka vrarë demonstruesin Faik Myrtaj ka dalë nga arma e kreut të gardës, Ndrea Prendi.

- Gjykata kundërshton natyrën e akuzës, vrasjes me dashje në rrethana cilësuese dhe që u soll për gjykim nga Prokuroria duke thene se e kufizojnë dy vendime të shpallura nga shkallët më të larta të gjyqësorit shqiptar.

- Vendimi i parë është një dokument i Gjykatës Kushtetuese, i vitit 1999, në të cilin thuhet se: Gjykata nuk është organ akuze dhe nuk formulon akuzë të re dhe as e ndryshon atë, por mbi bazën e fakteve të paraqitura bën cilësimin e duhur ligjor të veprës.

- Në argumentimin e vendimit për "21 Janarin", Gjykata e Tiranës shton dhe një tjetër vendim, atë të Kolegjit penal të Gjykatës së Lartë që i përket Dhjetorit 2011.

- Gjykata shprehet se ka marrë në referencë rrethanat si ka ndodhur ngjarja, që oficerët e akuzuar kanë qenë në krye të detyrës në mbrojtjen e institucioneve dhe personaliteteve të larta dhe jo për mënyrën se si janë kryer vrasjet e protestuesve.

- Gjykata justifikon përdorimin të armëve kur ata ndodhen në presionin apo tensionin e turmës. Këto janë vetëm disa nga argumentet e Gjykatës Penale të Tiranës, ndërkohë që të mërkurën pritet të bëhet publik i gjithë argumentimi i kësaj çështjeje.

HermesNews - ©2013

Dërgo me email | Stampo artikullin