13/02/2013 03:32:46

PD në koalicion me LSI-në; para ose pas zgjedhjeve. Poli i Tretë ?

Astrit Patozi, 'sa kohë nuk shikoj asgjë të institucionalizuar, unë sigurisht nuk kam pse të komentoj'

TIRANË - Nënkryetari i Partisë Demokratike (PD), Astrit Patozi, njëkohësisht kryetar i grupit parlamentar demokrat, deklaroi në një intervistë televizive se formula e funksionimit të koalicionit dhe ndarjes së mandateve do të jetë e njëjta si katër vite më parë.

I pyetur se a do të ketë drejtues të partive aleate në listat e PD-së, Patozi nuk beson se do do të ndodhë një gjë e tillë. Sipas tij nuk mund të ketë aventura të tilla dhe katapultime kryetarësh pasi një gjë e tillë do të shkatërronte sistemin. "Secila nga partitë do të konkurojë me siglën e saj", u shpreh Patozi.

Ai shtoi se është pak a shumë e njëjta formulë e ndarjes së mandateve dhe e mënyrës se si zgjidhen deputetët, si herët e tjera.

Nënkryetari demokrat u shpreh gjithashtu me bindje se PD-ja do të jetë sërish në pushtet me një mandat të tretë qeverisës. "Ne kemi një bindje absolute që ne të jemi sërish në pushtet pas zgjedhjeve dhe e mbështesim suksesin tonë jo thjesht tek programi, që do ta kemi shumë shpejt, por dhe te rezultatet e paimagjinueshme që ne kemi arritur gjatë tetë viteve", tha ai.

Besimi i kryetarit të grupit parlamentar demokrat bazohet dhe tek mundësia e përfshirjes sërish në koalicion e LSI-së, rezultati i së cilës do të determinonte fitoren e njërës apo tjetrës palë në zgjedhje.

Patozi shtoi se nuk besonte në një koalicion të LSI-së me kryetarin e PS-së, Edi Rama. "Besoj te pragmatizmi elektoral dhe eksperienca e Ilir Metës dhe e LSI-së si forcë politike", tha ai. Nënkryetari demokrat u shpreh i bindur se PD-ja do të ishte në koalicion me LSI-në, pavarësisht nëse kjo do të ndodhte para ose pas zgjedhjeve.

Patozi shtoi se koalicioni me LSI-në ka qënë funksional dhe një kontratë politike që ia ka vlejtur. "Koalicioni me LSI-në është një marrëdhënie luajale politike, është një kontratë politike që ia ka vlejtur, në radhë të parë për stabilitetin dhe qeverisjen e vendit dhe më pas për interesat e dy partive në veçanti. Ne i qëndrojmë marrëveshjes deri ditën e fundit të këtij mandati, pastaj është ende herët për të folur nëse do të kemi aleancë para apo pas zgjedhore", tha ai.

Patozi u pyet edhe për mundësinë e krijmit të një koalicioni të ri parazgjedhor ose si quhet Poli i Tretë. "Sa kohë nuk shikoj asgjë të institucionalizuar, unë sigurisht nuk kam pse të komentoj. Di që ka negociata, ka komunikim mes shumë aktorëve politikë, por kjo nuk ka asnjë rëndësi sa kohë që që nuk ka marrëveshje. Kur ato do të ndodhin, ne do t'u përgjigjemi atyre deri në fund", theksoi nënkryetari i Partisë Demokratike.

HermesNews - ©2013

Dërgo me email | Stampo artikullin