11/02/2013 12:10:43

Të rejat e ligjit për Sigurimet: kategoritë që përfitojnë

Ligji i ri i sigurimeve shëndetësore është punuar me ekspertët më të mirë, nën asistencën e Bankës Botërore dhe synon pikërisht mbulimin universal të popullatës

TIRANË - Masa e kontributit për popullsinë, me hyrjen në fuqi të ligjit të ri të sigurimeve shëndetësore në mars të këtij viti, nuk ndryshon. Norma e kontributit ka mbetur e pandryshuar 3.4%, ku gjysma paguhet nga punëdhënësi dhe gjysma nga punëmarrësi.

Drejtoresha e Institutit të Sigurimeve të Kujdesit Shëndetësor, Elvana Hana, tha sot se, edhe pse janë më të ulëtat në rajon (kështu Greqia e ka 6%, Maqedonia 10%, në vendet e BE-së si Gjermania, 16%), ishte vendim i Qeverisë për të ruajtur të pandryshuar masën e kontributeve.

"Ne i qëndrojmë skemës kontributive, e cila është një skemë funksionale në vendet e Bashkimit Europian, pasi dihet saktësisht financimi që shkon për shëndetësinë", thekson Hana.

Megjithatë, sipas saj, "duhet theksuar se të gjitha kategoritë në nevojë mbulohen nga Qeveria, e cila paguan 76% të fondeve totale dhe vetëm 24% vijnë nga kontributet në buxhetin e ISKSH-së".

Por, sipas saj, nuk duhet ngatërruar parimi universal dhe mbulimi universal i popullatës me kontributet. "Mbulimi universal është në bazë të skemës së sigurimeve sot në Shqipëri. Universializmi konstituohet, duke shtuar shërbime shëndetësore dhe duke mbuluar popullatën në nevojë, sikurse janë pensionistët, veteranët, të papunët, etj, kategori që mbulohen sot 100% nga skema jonë e sigurimeve", sqaroi më tej Hana.

Ky parim, sipas saj, sanksionohet më qartë në ligjin e ri të sigurimeve shëndetësore përmes paketave të mirëpërcaktuara të shërbimeve për të gjitha kategoritë në nevojë.

Ligji i ri i sigurimeve shëndetësore është punuar me ekspertët më të mirë, nën asistencën e Bankës Botërore dhe synon pikërisht mbulimin universal të popullatës. Ky ligj dhe zbatimi i tij përafron Shqipërinë me vendet e Bashkimit Europian, si në aspektin legjislativ, po ashtu edhe drejt rritjes së cilësisë dhe përsosjes së shërbimit shëndetësor në vend.

Ligji do të sjellë risi në sistem, por ndryshimi themelor është konstituimi në mënyrë moderne i marrëdhënieve midis blerësit të shërbimit dhe ofruesve të tij. Me futjen në fuqi të tij, në skemë do të përfshihen dhe institucionet shëndetësore private, ndërsa një nga hapat më të rëndësishëm në këtë aspekt është akreditimi i shërbimeve që do të hyjnë në kontraktim me ISKSH-në.

Kategoritë që përfitojnë/ Sipas ISKSH-së, kategoritë që përfitojnë janë të gjithë personat ekonomikisht aktivë, ku hyjnë të gjithë të punësuarit në sistemin shtetëror ose privat që janë të siguruar, si dhe të vetëpunësuarit në qytet ose në fshat, që vetësigurohen.

Ndërkohë, shteti kontribuon për personat joaktive si fëmijët, nxënësit dhe studentët me shkëputje nga puna, pensionistët, të paaftët (mendore dhe fizike), të papunët, personat që trajtohen me ndihmë ekonomike dhe asistencë sociale, nënat me leje lindjeje, shtetasit që kryejnë shërbimin ushtrak të detyruar.

HermesNews - ©2013

Dërgo me email | Stampo artikullin