10/02/2013 16:46:22

Ahmadinejad, pro dialogut me SHBA-në, nëse ndryshon qëndrim

'Propozimi i SHBA-së për një dialog dypalësh me Iranin për çështjen bërthamore është një ndryshim toni i nevojshëm, por jo i mjaftueshëm'

TEHERAN - Presidenti iranian, Mahmud Ahmadinexhad e gjykoi të nevojshëm një ndryshim të qëndrimit të SHBA-së për një dialog dypalësh për çështjen bërthamore dhe dënoi sanksionet ekonomike amerikane të vendosura kundër vendit të tij.

''Propozimi i SHBA-së për një dialog dypalësh me Iranin për çështjen bërthamore është një ndryshim toni i nevojshëm, por jo i mjaftueshëm'', konfirmoi sot presidenti iranian, Mahmud Ahmadinexhad duke stigmatizuar sanksionet amerikane.

"Ndryshimi i tonit është i nevojshëm, por jo i mjaftueshëm. Ndërprisni luftën ndaj nesh dhe ne do të negociojmë me ju'', theksoi presidenti iranian duke iu drejtuar SHBA-së, në një fjalim në Teheran me rastin e 34-vjetorit të Revolucionit islamik.

"Ju keni bërë gjithçka për të na penguar të bëhemi një vend bërthamor dhe keni dështuar. Zgjidhja më e mirë është bashkëpunimi dhe marrëveshja'', shtoi ai duke kërkuar një dialog në respektim të drejtësisë dhe jo nën presion.

SHBA-ja, armiku historik i regjimit islamik, njoftoi këto ditët e fundit se ishte e gatshme për një dialog të drejtpërdrejtë me Teheranin në përpjekje të zgjidhjes së krizës bërthamore duke vendosur sanksione të tjera të njëanshme kundër Iranit.

Zëvendëspresidenti amerikan, Joe Biden bëri javën e kaluar një ofertë serioze për dialog të drejtpëdrejtë dhe dypalësh me iranianët në kuadër të negociatave mes Teheranit dhe grupit 5+1 (SHBA, Francë, Britani e Madhe, Rusi, Kinë dhe Gjermani) për programin bërthamor.

Por lideri suprem, ajatollahu Ali Khamenei hodhi poshtë çdo dialog nën kërcënim. Pas disa muajve ndërprerje, grupi 5+1 dhe Irani do të rifillojnë diskutimet e tyre më 26 shkurt në Kazakistan.

HermesNews - ©2013

Dërgo me email | Stampo artikullin