09/02/2013 10:21:51

Sigurimi i makinave: çmimi tre herë më i lartë

Në agjencitë e shitjes së primeve të sigurimit të automjeteve çmimi i një primi shkon në 18 mijë lekë, ndërsa pak javë më parë llogaritej 6 mijë lekë

TIRANE - Çmimi për sigurimin e detyrueshëm të makinës brenda pak javësh është rritur me rreth 3 herë pas presionit të Autoritetit të Mbikëqyrjes Financiare për të rritur çmimin në masën e primit të rrezikut.

Në agjencitë e shitjes së primeve të sigurimit të automjeteve çmimi i një primi shkon në 18 mijë lekë, ndërsa pak javë më parë llogaritej 6 mijë lekë. Kompanitë e sigurimeve, krahas rritjes së çmimit të primit, kanë hequr diferencimet sipas fuqisë motorike të mjetit. Sigurimi kushton njëlloj si për një makinë me motor 800 kubikësh, ashtu edhe për një me motor 3 000 kubikësh.

Pak ditë më parë Autoriteti i Mbikëqyrjes Financiare mblodhi kompanitë e sigurimeve dhe ju kërkoi të rrisnin çmimet të paktën mbi vlerën e primit të rrezikut. Primi i rrezikut llogaritet nga AMF si vlera minimale e domosdoshme për mbulimin e dëmeve.

Në datë 15 janar 2013 Kryetarja e Autoritetit, Enkeleda Shehi, zhvilloi një takim me drejtorët e shoqërive të sigurimit ku diskutoi për produktin e sigurimit të detyrueshëm motorik (MTPL), si në drejtim të tarifave të zbatuara, ashtu edhe në drejtim të pagesës së dëmshpërblimeve. Ajo vlerësoi se tarifat e zbatuara janë në nivele relativisht të ulëta, nëse krahasohen me vlerësimin e riskut për produktin.

Në bazë të ligjeve përkatëse në fuqi, të ndryshuara, tregu i sigurimit të detyrueshëm motorik është i liberalizuar dhe përcaktimi i primit të shitjes është detyrë e çdo shoqërie sigurimi. Në këto kushte, përpjekjet e shoqërive për të zbatuar tarifa në nivele të ulëta që orientohen kryesisht drejt ruajtjes së pozicionit të tyre në treg, janë pasqyruar në çmime më të ulëta sesa primi i riskut.

Një qasje e tillë, theksoi kryetarja e AMF-së, mbështetet në objektiva afatshkurtër në administrimin e këtij produkti dhe nëse nuk orientohet nga objektivat afatgjatë mund të sjellë efekte negative në qëndrueshmërinë financiare të shoqërive

Znj. Shehi propozoi marrjen e një sere masash në drejtim të përmirësimit të situatës, duke filluar me përditësimin e informacionit në sistemin online, deri në marrjen e masave sipas përcaktimeve ligjore në fuqi për rastet e shkeljeve apo të moszbatimit të dispozitave ligjore.

HermesNews - ©2013

Dërgo me email | Stampo artikullin