06/02/2013 18:43:24

Ilir Meta, OnLine me pyetje-pergjigjet e qytetareve

Meta, 'Lëvizja Socialiste për Integrim është një forcë politike që i qëndron marrëveshjeve''

TIRANË - Lideri i LSI-së, Ilir Meta, u është përgjigjur në kohë rekord 342 pyetjeve të bëra drejtpërdrejt nga shqiptarët në “Facebook” për papunësinë, koalicionet e ardhshme dhe integrimin. Gjatë këtij komunikimi Meta ka preferuar të shmangë stafin e tij për t’ju përgjigjur në mënyrë të drejtpërdrejtë pyetjeve të qytetarëve.

Pyetja që ka zgjuar më shumë interes tek bashkëbiseduesit në fb, kishte të bënte me koalicionin e ardhshëm të LSI-së, për të cilën Meta tha se "mund t’ju them se Lëvizja Socialiste për Integrim është një forcë politike që i qëndron marrëveshjeve. Këtë e ka bërë edhe me Partinë Socialiste përpara zgjedhjeve lokale të vitit 2007, pavarësisht se ishte ajo që nuk i qëndroi marrëveshjes pas rizgjedhjes së kryetarit të saj si kryetar i Bashkisë së Tiranës. Po këtë qëndrim u mbajtëm edhe me Partinë Demokratike pas koalicionit që imponoi vota dhe rezultati i qershorit të vitit 2009.

Ne gjykojmë që në dy javët e para të muajit prill të hapet debati lidhur me çështjen e koalicionit të ardhshëm dhe brenda 16 prillit, pra një javë përpara së të përfundojë afati i fundit për regjistrimin e koalicioneve, të merret një vendim përfundimtar dhe sa më i përgjegjshëm i Konventës Kombëtare të LSI-së”.

Ndërsa i pyetur për papunësinë, kreu i LSI tha se “Motoja e LSI-së është “Arsimim për punësim”. Kjo do të thotë që nuk është e rëndësishme për një të ri vetëm të arsimohet, por është e rëndësishme që të arsimohet në funksion edhe të mundësisë për të gjetur një punë të sigurt për të ardhmen e tij".

Një pyetje tjetër e drejtuar për z. Meta kishte të bënte me tre ligjet që po mbajnë peng integrimin e vendit në BE, për të cilën ai tha se "këto ligje janë bërë të famshme sepse janë bërë objekt i një debati të jashtëzakonshëm përgjatë këtyre muajve. Është faji i konfliktit politik dhe i bllokimit që nuk kanë ndihmuar për të realizuar konsensusin e domosdoshëm prej 3/5 që duhet për miratimin e tyre. Sikurse edhe Komisioneri për Zgjerim ka theksuar është kërkesa minimale që Shqipëria të miratojë këto tre akte për të pasur një raport pozitiv për marrjen e statusit të vendit kandidat. Ky ka qenë edhe qëllimi i vizitës më të fundit të komisionerit Fyle në vendin tonë, përveç angazhimit për t’i ftuar palët për të mos dëmtuar standardin e zgjedhjeve që po vijnë"./b.k/s.s/

HermesNews - ©2013

Dërgo me email | Stampo artikullin