05/02/2013 10:16:19

Ligji, ja kush do të mbajë armë

Për të mbrojtur draftin në komision ishte i pranishëm zv/ministri i Brendshëm, Arben Ristani

TIRANË - Komisioni parlamentar i Ligjeve nisi të martën shqyrtimin e pr/ligjit Për armët, që synon të rregullojë kushtet për blerjen, mbajtjen, prodhimin, tregtimin, shitjen, transportimin e importimin e armëve dhe municioneve brenda territorit shqiptar, si dhe eksportimin e tyre jashtë vendit.

Për të mbrojtur draftin në komision ishte i pranishëm zv/ministri i Brendshëm, Arben Ristani. Në prezantimin e tij u theksua se drafti me 37 nene, ka qëllim përafrimin me direktivën e BE-së, "Për kontrollin e blerjeve dhe posedimit të armëve".

Sipas Ristanit, ligji i ri përfshin një fushë të gjerë veprimi, ndërsa dispozitat e tij nuk zbatohen për armët e Forcave të Armatosura Shqiptare. Një kapitull i veçantë i ligjit lidhet me personat që kanë të drejtë të pajisen me autorizim për mbajtje arme zjarri nga organi kompetent i Policisë së Shtetit, ku përfshihen deputetët, anëtarët e Këshillit të Ministrave, të Gjykatës Kushtetuese, të Gjykatës së Lartë, Prokurori i Përgjithshëm zv/ministra, prefektë, kryetarë të qeverisjes vendore, gjyqtarë, etj,

Neni 20 i njeh të drejtën e mbajtjes së armës dhe autoriteteve të huaja, sipas marrëveshjeve ndërkombëtare dhe parimit të reciprocitetit, ku bëjnë pjesë diplomatët e huaj, nëpunës të konsullatave, punonjës të misioneve ushtarake në Shqipëri, etj.

HermesNews - ©2013

Dërgo me email | Stampo artikullin