01/02/2013 17:35:42

Atentat kamikaz ne Ambasaden Amerikane

Shpërthimi ndodhi para një hyrjeje dytësore para ambasadës amerikane, njoftoi CNN Turk

(18:16) Franca dënoi ashpër shpërthimin e një bombe, që ndodhi sot përpara ambasadës amerikane në Ankara, u shpreh ministri i Jashtëm francez, Laurent Fabius. "Dënoj ashpër atentatin që sapo goditi ambasadën amerikane në Ankara", deklaroi ai.

Departamenti amerikan i Shteitit konfirmoi sot se një atentat terrorist ndodhi në perimetrin e ambasadës në Ankara, pa dhënë hollësi të mëtejshme mbi viktimat apo dëmet materiale.

Sipas autoriteteve turke, një kamikaz shpërtheu një bombë përpara ambasadës duke shkaktuar vdekjen e tij dhe të një agjenti turk të sigurisë dhe duke plagosur rëndë një grua.

Sipas ministrit të Brendshëm turk, Muammer Gyler kamikazi bënte pjesë në një organizatë të ekstremit të majtë.


(18:00) Administrata amerikane po bashkëpunon me policinë turke në hetimet e nisura lidhur me atentatin e sotëm ndaj ambasadës së SHBA-së në Ankara, njoftoi Departamenti amerikan i Shtetit.

''Po bashkëpunojmë me autoritetet e policisë turke për të zbardhur ngjarjen e rëndë që shkaktoi dy të vdekur sot në Ankara'', thuhej në një deklaratë të Departamentit amerikan të Shtetit.

Në atentatin e sotëm po ashtu veç dy personave që humbën jetën, njëri ishte kamikazi dhe tjetri një roje turke pranë ambasadës, është plagosur rëndë dhe është në gjendje kritike edhe një gazetare turke, njoftonte në faqen e saj të internetit e përditshmja vendase Hurriyet.

Didem Tuncay, 38 vjeç, ish-reportere e televizionit privat Ntv, ndodhet ''në kushte kritike për jetën'' sipas të përditëshmes pasi kishte marrë plagë të rënda në kokë. Ajo po hynte në ambasadë për të marrë një vizë për në SHBA kur ndodhi atentati.


ANKARA - Një shpërthim, origjina e të cilit nuk dihet ende, shkaktoi vdekjen e një personi pranë ambasadës së SHBA-së në Ankara, njoftoi agjencia zyrtare e lajmeve Anadolli Azhans.

''Shpërthimi ndodhi para një hyrjeje dytësore para ambasadës amerikane'', njoftoi agjencia e lajmeve duke shtuar se në vendngjarje ndodhet dhe shefi i policisë turke, Mehmet Kiliçlar.

Kryetari i Partisë Socialiste, Edi Rama, shprehu solidaritet të plotë ndaj Shteteve të Bashkuara të Amerikës, pas ngjarjes së sotme në Ankara (Turqi), ku një shpërthim i fuqishëm u regjistrua para ambasadës amerikane.

Nëpërmjet rrjetit Social Twitter, lideri i opozitës u shpreh se "Shqipëria ka qenë, është e do të mbetet solidare me SHBA në çdo front të kësaj lufte të vështirë, por të pashpresë për forcat e errësirës".

"Sulmi mbi ambasadën amerikane në Ankara është vazhdë e një lufte të dëshpëruar të forcave të errësirës kundër forcës simbol të botës demokratike", thekson kryesocialisti Rama.

HermesNews - ©2013

Dërgo me email | Stampo artikullin