31/01/2013 18:59:48

Sarandë, tre këshilltarë i ikin PS-së: bashkohen me LSI-në

Lajmi është bërë publik nga kryetari i këshillit bashkiak, Ilir Nikolla, në mbledhjen e sotme t

SARANDË - Tre këshilltarë socialistë nga këshilli bashkiak i Sarandës, deklaruan sot largimin nga PS-ja dhe aderimin në LSI. Kjo është bërë publike nga kryetari i këshillit bashkiak, Ilir Nikolla, në mbledhjen e sotme të Këshillit Bashkiak.

Nikolla tha se me këtë ndryshim të përkatësisë politike të këshilltarëve Enkelejda Vasili, Delfin Hajno dhe Hajri Goxhaj, këshilli bashkiak pëson një konfigurim të ri.

"Tashmë është krijuar grupi reformator i qendrës, me shtimin e numrit të këshilltarëve të LSI në këshillin bashkiak të Sarandës. Gjithashtu ky ndryshim do të reflektojë shumë shpejt edhe në strukturën dhe përbërjen e kryesisë së këshillit bashkiak, përmes një votimi të ri për këtë forum të këshillit bashkiak", tha Nikolla.

Këshilltarët e larguar nga PS nuk kanë qenë prezent në mbledhjen e sotme të këshillit bashkiak, por deklarata e largimit dhe aderimit të tyre ka qenë depozituar me shkrim në kryesinë e këshillit bashkiak, por ata nuk shprehen për arësyet e kësaj lëvizjeje.

Këshilli bashkiak është njohur dhe e ka kaluar deklaratën pa procedurë. Disa këshilltarë socialistë e kanë konsideruar këtë vendim të kolegëve të tyre si deformim të votës socialiste nga këta këshilltarë.

Mësohet se të njëjtin deklarim 3 këshilltarët socialistë e kanë paraqitur edhe në kryesinë e degës së PS në Sarandë.

HermesNews - ©2013

Dërgo me email | Stampo artikullin